Barcelona u poshtërua në shtëpi nga Bayern Munich. Kjo nuk është asgjë e re; bavarezët bashkohen me Juventusin dhe PSG në serinë e disfatave shumë të rënda, që ia kanë shkaktuar në shtëpi skuadrës katalanase. Në Evropë duket qartë se ka mbetur vetëm emri nga Barça e quajtur me të drejtë “Dream Team” deri para pak vitesh.

Tifozët janë tepër të indinjuar në Katalonjë. Situata është midis pafuqisë financiare dhe dorëheqjes teknike, në atë masë sa Laporta edhe një herë duhej të dilte vetë “në fushë”. Presidenti i Barçës shpërndau një video, në të cilën shpreh indinjatën për atë që po ndodh dhe kërkon nga katalanasit ta mbështesin ekipin; t’u japin një dozë besimi atyre që menaxhojnë klubin.

Është e vështirë të kërkosh durim nga ata që kanë parë, në vetëm pak vite, të rrëzohet një superfuqi, së pari, dhe të durojnë marrëzitë e drejtuesve me largimin e Messit. Përmes një lloj fjalimi drejtuar “kombit blaugrana”, Laporta kërkon durim dhe besim:

"Përshëndetje culés, unë jam i lënduar dhe i indinjuar si të gjithë ju. Duhet t’ju them se ajo që po ndodh është një nga skenarët që ne e kemi menduar. Kërkoj durimin tuaj. Ju lus të vazhdoni ta mbështesni ekipin. Edhe unë, gjithashtu, ju kërkoj të besoni cilindo që është në drejtimin e klubit. Ne kemi nevojë për këtë mbështetje. Mos dyshoni, ne do të rregullojmë gjithçka".

Një mesazh që nuk ndryshon shumë nga ajo që Pique vuri në dukje në fund të ndeshjes me Bayernin. Me ndershmëri të madhe, mbrojtësi qendror dhe kapiteni i Barcelonës pranoi se skuadra e tij aktualisht është e ndarë nga një hendek i madh me klubet kryesore. Pak fjalë, por të sinqerta, sepse ky është realiteti.

Dhe koncepti i përsëritur nga presidenti vetëm shton dyshimet në sezonin aktual të Barcelonës. Edhe ideja e ndryshimit teknik, për momentin, është jashtë diskutimit. Në këtë moment klubi nuk mund të lejojë të largojë Koeman, i cili do të mbetej ende në listën e pagave të rëndësishme, me 8 milionë euro në sezon.