Ministrja e Ekonomisë dhe Financave, Anila Denaj, një ditë më parë, pranoi se nëse vendimi përfundimtar i gjykatës do të jetë pro sipërmarrësit italian, Francesco Becchetti, atëherë sigurisht që shteti shqiptar do ta paguajë gjobën 110 milionë euro ndaj tij.

Në lidhje me këtë deklaratë ka reaguar deputetja tashmë e zgjedhur e qarkut Tiranë, Grida Duma, e cila ka publikuar në rrjetet sociale një video kur kryeministri Edi Rama sipas saj deklaronte që “Becchetti ka për të marrë atë që s’thuhet”.

Krahas videos, Grida Duma ka akuzuar Kryeministrin Edi Rama se është përgjegjësi i drejtëpërdrejtë që Shqipëria ka humbur 110 milionë euro ndaj Becchetti-t.

“Edi Rama mund të përpiqet t’i fshihet të vërtetës, por nuk e zhbën dot atë.

Ai është përgjegjësi i drejtpërdrejtë për dëmin ekonomik prej 110 milionë euro që do të paguajnë familjet shqiptare nga xhepat e tyre.

Secili prej nesh, nga një i porsalindur deri tek çdo pensionisit, do të paguajmë 45 mijë lekë të vjetra.

Para këto, që mund të shkonin për shkolla, spitale, rrugë, për ndihmë ekonomike për njerëzit në nevojë, për të blerë ushqime, por do të shkojnë për të dëmshpërblyer luftën personale të Ramës me median.

Shteti i kapur nga korrupsioni u përdor për këtë luftë personale, prandaj përgjegjësit e kësaj fature prej 110 milionë euro duhet të shkojnë para drejtësisë.

Mjaft kanë paguar shqiptarët për dëmet ekonomike të shkaktuara nga një pushtet i korruptuar deri në palcë.

Është koha të paguaj Edi Rama!” shkruan Grida Duma.