Kardiologu i njohur: Eriksen nuk mund të luajë futboll me defibrillator në trup

Federata Daneze e Futbollit ka njoftuar se Christian Eriksen pranoi t’i nënshtrohet një operacioni, në të cilin iu vendos një defibrilator kardiak nënlëkuror (ICD).

Vendimi erdhi në harmoni midis lojtarit dhe disa specialistëve kombëtarë e ndërkombëtarë. Në sajë të kësaj pajisjeje, kampioni i Interit nuk do të rrezikojë më jetën e tij pas aritmisë, që çoi në arrest kardiak gjatë ndeshjes Danimarkë-Finlandë në Kampionatin Europian.

Tani po hapet një fazë e re në jetën dhe karrierën e tij, në të cilën u bë e nevojshme të kuptohet nëse Eriksen mund të jetë në gjendje të kthehet të luajë futboll në një nivel profesional.

Dr.Lucio Mos, president i Shoqatës Italiane të Kardiologjisë Sportive, shpjegoi se çfarë është ICD dhe cilat janë perspektivat për Eriksen.

Eriksen pranoi t’i implantohet një defibrilator kardiak nënlëkuror. Çfarë është ai?

Është një pajisje e vogël, që vendoset nën lëkurë, nën kockën e qafës dhe zbulon aktivitetin e zemrës vazhdimisht. Në rast të një aritmie kërcënuese për jetën, ajo ndërhyn me një goditje të vogël elektrike dhe e bllokon atë.

Çfarë lloj operacioni kërkohet për të implantuar pajisjen?

Operacioni është shumë i thjeshtë nga pikëpamja teknike. Bëhet me anestezi lokale dhe zgjat rreth një orë. Fakti është që nuk dihet pse u mor ky vendim. Nëse ata shkuan në një operacion si ky, kjo do të thotë Eriksen ka pasur një aritmi kërcënuese për jetën. Nuk e di nëse ekziston një sëmundje themelore e zemrës, por është një pajisje që vihet për të parandaluar vdekjen e papritur.

Për sa kohë do të duhet që Eriksen të ketë një ICD? A është një masë e përhershme apo mund të jetë për një kohë të shkurtër?

Përgjithësisht është një masë e përhershme, por në disa raste mund të ndikojë edhe në një periudhë më të shkurtër, megjithëse dyshoj shumë se është kështu. Duhet të dini diagnozën, nëse është bërë tashmë diagnostifikimi. Ato janë teste të veçanta, duhet pak kohë.

A mundet një futbollist profesionist të fitojë gjendje fizike sportive në Itali duke pasur një defibrilator për zemrën?

Në Itali, absolutisht jo, nuk ka diskutim. Protokollet italiane parashikojnë që nuk mund të lejohet. Mund të luajë vetëm bilardo, shah, sporte të këtij lloji. Ne kemi legjislacionin më mbrojtës ndaj sportistit në gjithë Europën.

Sa i pajtueshëm është futbolli me sëmundjet e zemrës në krahasim me sportet e tjera?

Futbolli, si shumë sporte të tjera, ka dy parakushte: përkushtimin fizik dhe kontaktin. Nuk ka trauma si në boks, por kontaktet janë ende të shpeshta. Sëmundja e zemrës nuk është e përputhshme me një sport kontakti si futbolli. Pastaj është gjithmonë e vështirë të dallosh midis asaj që është konkurruese dhe asaj që nuk është e tillë.

Sa e ndryshon kjo ndërhyrje skenarin për të ardhmen e tij. A do të jetë në gjendje Eriksen të vazhdojë të luajë?

Në përgjithësi, unë besoj se nuk mund të vazhdojë të luajë. Ne nuk mund të hipotezojmë një aktivitet sportiv konkurrues, përveç nëse problemi i tij ishte diçka e kthyeshme, e cila jep mundësinë për të hequr pajisjen, por ky nuk më duket se është rasti. Ndër të tjera, në sportet e kontaktit, të kesh një defibrilator kardiak nënlëkuror mund të jetë shumë e rrezikshme në rastin e traumës. Legjislacioni jashtë nuk është aq i rreptë sa në Itali, por dyshoj se do të rifillojë të luajë”.