Agjencia Evropiane e Barnave rinis shqyrtimin e vaksinës kineze. Cilat janë pritshmëritë
Transmetuar më 06-05-2021, 06:54

Agjencia Evropiane e Barnave ka nisur procedurën e rishikimit të vaksinës kundër koronavirusit, të kompanisë kineze Sinovac. Të dhënat do të analizohen me procedurë të përshpejtuar.

Ekspertët e Agjencisë Evropiane të Barnave (EMA) me seli në Amsterdam sqaruan se vendimin për nisjen e analizave e morën në bazë të rezultateve paraprake të studimeve klinike dhe laboratorike.

Nga ato bëhet e qartë se vaksina e prodhuesit kinez Sinovac Biotechstimulon prodhimin e antitrupave kundër virusit korona dhe për këtë arsye ai mund të jetë efektiv për t’u mbrojtur prej COVID-19.

Shqyrtimi i vaksinës bëhet sipas të ashtuquajturit proces i rishikimit të studimeve. Kjo do të thotë se rezultatet e para të testeve shkencore dhe klinike analizohen gradualisht, para se të jenë në dispozicion të gjitha të dhënat e kërkuara për aprovim dhe para se të dorëzohet aplikimi zyrtar për miratim për shitje në treg.

Për të gjitha vaksinat kundër koronës të aprovuara deri më sot, EMA ka ndjekur këtë procedurë në mënyrë që të përshpejtojë një aprovim të mundshëm.

Deri tani miratim për përdorim në tregun e të gjitha vendeve të BE-së kanë vetëm vaksinat kundër koronës të prodhuesve nga vendet perëndimore, pra preparatet e BioNTech/Pfizer, Moderna, AstraZeneca dhe Johnson & Johnson.

Hungaria përdor gjithashtu vaksinën e prodhuesit kinez Sinopharm dhe vaksinën ruse Sputnik V. Në fillim të marsit, EMA filloi procesin për miratimin e vaksinës ruse Sputnik V.

Shqipëria mori paktën 100 mijë doza CoronaVac të kinezes Sinovac përmes Turqisë. Por së fundi është bërë e ditur se Turqia po dërgon vaksinë të prodbuar në Turqi me formulën e Sinovac, gjithsesi e pamiratuar nga Kina.