Mjekët e Diego Armando Maradonës mund të përballen me akuza për vrasje pa paramendim, pasi raporti mjekësor ka gjetur se legjenda argjentinase nuk kishte marrë trajtim të duhur mjekësor.

Maradona vdiq nga sulmi në zemër më 25 nëntor 2020, disa javë pas një operacioni në tru.

Një raport mjekësor mbi vdekjen e tij, i kryer nga një komision i caktuar nga autoritetet lokale argjentinase, nënvizon se vdekja e ish-sulmuesit të Barcelonës dhe Napolit ka mundur të shmangej.

Raporti konfirmoi se Maradona vdiq nga një sëmundje paraprake e zemrës, por erdhi në përfundim se kishte neglizhencë të përgjithshme në kujdesin e pacientit e cila ndikoi në vdekjen e tij.

Raporti e dënon mungesën e kujdesit mjekësor në ditët e fundit të jetës së Maradonës.

Mjekët nuk kishin qenë të vetëdijshëm për sëmundjet e shumta të zemrës me të cilat përballej Maradona, duke qenë se ata nuk i kishin bërë kurrë ekzaminime të rregullta fituesit të Kupë së Botës më 1986, sipas raportit.

Shtatë persona janë nën hetime për vdekjen e tij, përfshirë mjekun personal të Maradonës, Leopoldo Luque.