Denoncimi/ Skandali i vaksinave të skaduara në vendin tonë, reagon ISHP
Transmetuar më 24-04-2021, 17:16

Pas denoncimit të ish-ministrit të Shëndetësisë, Tritan Shehu se vaksinat e ardhura në Shqipëri kanë skaduar, ka reaguar edhe Instituti i Shëndetit Publik.

Përmes një postimi në rrjetet sociale, ISHP e konsideron një përpjekje të dështuar për të dekurajuar qytetarët nga zgjidhja e vetme siç është vaksinimi, për t’i dhënë fund pandemisë.

“Sjellja e tyre është kryer nën mbikqyrjen e agjencive përkatëse dhe janë të shoqëruara me të gjithë dokumentacionet që garantojnë sigurinë dhe cilësinë e tyre.”

ISHP siguron qytetarët se vaksinat janë të sigurta dhe janë brenda standardeve të ruajtjes.

Njoftimi i plotë i ISHP:

Përdorimi i procesit të vaksinimit për qëllime të fushatës zgjedhore është një përpjekje e dështuar për të dekurajuar qytetarët, nga e vetmja zgjidhje për t’i dhënë fund pandemisë dhe për t’iu kthyer jetës së dëshiruar prej 14 muajsh.

Vaksinat janë të sigurta, ato janë sjellë në Shqipëri brenda të gjithë standardeve të ruajtjes.

Sjellja e tyre është kryer nën mbikqyrjen e agjencive përkatëse dhe janë të shoqëruara me të gjithë dokumentacionet që garantojnë sigurinë dhe cilësinë e tyre.

Kushtet e ruajtjes, shpërndarja dhe aplikimi i tyre janë brenda të gjithë standarteve teknike, siç është vepruar me të gjitha vaksinat, për dekada të tëra.

Indeksi më i lartë i këtyre praktikave është mbulesa vaksinale në Shqipëri dhe kërkesat e qytetarëve për t’u vaksinuar kundër COVID -19.

Autoritetet shëndetësore kanë garantuar vaksina të sigurta dhe po vijojnë me aplikimin e tyre, sipas planit kombëtar të vaksinimit.

Çdokush që hedh baltë mbi sigurinë e procesit, dëmton jetën e qytetarëve!

Vaksinohuni! Vaksinimi shpëton jetë!” – thuhet në njoftimin e ISHP.

Kandidati për deputet i Partisë Demokratike në Qarkun e Gjirokastrës, Tritan Shehu denoncoi më herët skandalin e vaksinave të skaduara. Shehu i bëri thirrje Prokurorisë të marrë masat.

Pretendimi nga Tritan Shehu:

Skandal! Vaksina te pa sigurta dhe te skaduara qe me 4 prill po u injektohen aktualisht qytetareve ne tendat e Sheshit Skenderbej!

Prokuroria duhet menjehere te nderprese kete veprim te pa pergjegjshem, te rrezikshem e te filloje nje hetim te plote.

Jane vaksina “Kineze” me ambalazhe te shkruara turqisht, jo vetem te pa certifikuara nga asnje organizem nderkombetar, me efikasitet shume te ulet sipas vete kinezeve, por dhe me date skadence te tejkaluar qe me 4 Prill.

Qytetareve nuk ju tregohet ky fakt i rende edhe nga operatoret sanitare aty!

Duhej nje insistim i forte i disa prej tyre qe te shikonin ambalazhin, e me tej te refuzonin injeksionin.

Pergjegjesi e rende kjo per Qeverine, por dhe per personelin shendetesor qe e aplikon, pavaresisht urdherit qe u kane dhene.

Edhe ata duhet te kuptojne se Betimi i Hipokratit qendron mbi cdo urdher administrativ.

Shume shpejt dhe shqiptareve do tu ofrohen vetem ato vaksina e medikamente te sigurta, qe u ofrohen edhe italianeve, grekeve, gjermaneve, te gjithe BE, duke respektuar rregullat europiane per kete. /a.m/NOA.al