Komiteti Teknik vendos për hapjen graduale të shkollave: Klasat që i rikthehen mësimit
Transmetuar më 19-04-2021, 14:12

Komiteti Teknik i Ekspertëve është mbledhur sot për të marrë vendimet e radhës.

Kryetarja e Komitetit të Ekspertëve, Mira Rakacolli tha se si rezultat i përmirësimit të shifrave, gjimnazistët e viteve të para dhe të dyta mund të fillojnë skenarin e kthimit në shkolla.

“Situata paraqitet ndjeshëm drejt përmirësimit, që është rezultat i masave të propozuara në kohën e duhur, dhe një bashkëpunim më i mirë i vërejtur nga qytetarët. Ka filluar të ndihet edhe efekti i vaksinimit masiv”.

“Komiteti vlerëson se nxënësit e viteve të para dhe të dyta në shkollën e mesme, mund të fillojnë edhe mësimin në klasë".

U njoftua se duke nisur nga nesër, qytetarët që futen në Shqipëri nga Maqedonia e Veriut dhe Greqia do duhet që të qëndrojnë në karantinë për dy javë.

Në rajon situata paraqitet ndryshe. Në Maqedoninë e Veriut dhe në Greqi numri i rasteve është shtuar, por edhe numri i jetëve të humbura. Sfida është përmirësimi i indikatorëve. Mosrespektimi sa duhet nga disa subjekte politike mund të jetë faktor, afrimi i Pashkëve është shoqëruar më lëvizje nga vendet fqinje. Duke pasur parasysh edhe situatën lokale, ku vendin e parë e zë Gjirokastra, mendojmë që:

“Te vendoset qëndrimi në karantinë për personat që vijnë nga Maqedonia dhe Greqia deri në datën 3 maj.

Gjithashtu, edhe një paralajmërim për fushatën.

“Të nderuar shifrat në përmirësim tregojnë se drita në fund të tunelit po zmadhohet, por mos harroni se kemi rrugë për të bërë. Subjektet politike të tregojnë përgjegjshmëri, dhe qytetarët të vazhdojnë të ndjekin me rigorozitet masat e propozuara nga ne”, tha Rakacolli. /a.m/NOA. al

E plotë

Komiteti Teknik i Ekpertëve: Rikthehen në klasa shkollat e mesme, karantinë 2-javore për personat që vijnë nga Maqedonia e Veriut dhe Greqia

Tiranë, 19 Prill – Komiteti Teknik i Ekspertëve ka vendosur që për dy javët e ardhshme, personat që vijnë nga Maqedonia e Veriut dhe Greqia bëjnë karantinë, për të kufizuar përhapjen e covid19, nisur nga situata në këto vende si dhe për shkak të lëvizjes së shtuar të pritshme, nga pashkët ortodokse. Vendimi tjetër i Komitetit Teknik lidhet me rikthimin e mësimit të kombinuar në gjimnaze. “Afrimi i ditës së Pashkëve gjithmonë është shoqëruar me lëvizje të qytetarëve nga vendet fqinje, që mund të vendosin vendin në një situatë të rënduar epidemiologjike. Si dhe duke pasur parasysh dhe situatën tonë lokale, ku vendin e parë për numër rastesh të reja e zë Gjirokastra, pasuar nga Korça, mendojmë që duke filluar nga dita e nesërme të vendoset qëndrimi në karantinë dy javore për personat që vijnë nga Maqedonia e Veriut dhe Greqia, deri në datën 3 maj. Do ta rivlerësojmë, në varësi të dinamikës së situatës, do ta vlerësojmë përsëri pas dy javësh. Komiteti vlerëson se nxënësit e viteve të para dhe të dyta të shkollave të mesme, të cilët kanë qenë në mësim online, si rezultat i përmirësimit të situatës epidemiologjike në vend mund të fillojnë edhe mësimin në klasë, të futen në skenarin e kombinuar”, tha Rakacolli. Duke folur për situatën epidemiologjike, Drejtoresha e Insitutit të Shëndetit Publik Prof. Albana Fico, deklaroi se ka një ulje të incidencës dy javore. “Mesatarja javore e rasteve pozitive nga 172 në 138, incidenca javore ka shkuar në 108 nga 187. Mesatarja ditore të diagnostifikuar pozitiv ka zbritur nga 265 në 172. Numri total i rasteve aktive në Shqipëri është 25 mijë e 668. Numri i bashkive ka zbritur nga 36 në 33, mbetet raporti meshkuj femra 48% me 52% në raport me infeksionin ndërkohë që është e ndryshuar me humbjet e jetës. Komponent i rëndësishëm mbetet edhe numri i shtrimeve në spitale ku deri dje ka qenë 174 në spitalin Covid 1 dhe 2 dhe tre spitale rajonale, vlen për të theksuar që spitali Covid 3 dhe 4 nuk kanë pacient për momentin por janë në gatishmëri të plotë. Ulja e numrit të shtrimeve shkon edhe me uljen e personave në gjendje më të rëndë të cilët janë në terapi intensive gjithashtu edhe numri i të intubuarve, tha Fico. Drejtori i Qendrës Kombëtare të Urgjencës Mjekësore, Dr. Skendër Brataj bëri me dije se thirrjet tek 127 vijojnë të jenë konstante. “Kemi rreth 2 mijë thirrje nga 1700 që kanë qenë. Por nga analiza që ne bëmë u vu re që kërkesa më e madhe ishte informacion mbi vaksinat, llojet e vaksinave dhe sidomos qytetarët që janë me patologji kronike duke kërkuar shpjegime më shumë. Ndërsa përsa i përket vizitave kemi rënë poshtë numrit 300 në 24 orë. Dhe për Covid në 24 orët e fundit janë vetëm 38”, tha Dr. Brataj. Vendimet e Komitetit Teknik të Elspertëve do të vlerësohen në varësi të situatës epidemiologjike.