Trajneri i Shqipërisë thirrje qeverisë, duam tifozët në stadium kundër Anglisë
Transmetuar më 21-03-2021, 14:47

Trajneri i Kombëtares kuqezi Edi Reja i bëri sot thirrje qeverisë që të lejojë një numër të kufizuar spektatorësh për të marrë pjesë në ndeshjen kualifikuese të Kupës së Botës kundër Anglisë.

Vetëm tifozët do të mund të motivojnë ekipin.

Më herët ministria e Shëndetësisë pas kërkesës së FSHF-së, tha se për shkak të rritjes së rasteve të përditshme të koronavirusit, asnjë spektator nuk do të lejohej të shikonte ndeshjen kualifikuese të Kupës së Botës, e vlefshme për kualifikueset e Grupit I. Kjo ndeshje është planifikuar të luhet në Tiranë, më 28 Mars.

FSHF, në përputhje me rregullat e UEFA-s, i kërkoi qeverisë për të mbushur 30% të vendeve – ose të kishte rreth 6,500 tifozë – në stadiumin “Arena Kombëtare”.

Edoardo Reja, trajneri italian i Shqipërisë, tha se lojtarët do të ishin shumë të kënaqur të shikoheshin spektatorët "të cilët do t’i kritikonin, motivonin (ata) … sepse futbolli pa publik nuk mund të ekzistojë".

“Ndeshja me spektatorët ka një shije tjetër," tha Reja kur prezantoi skuadrën e tij përpara tre kualifikimeve të këtij muaji – dy ndeshjet jashtë ndaj Andorrës dhe San Marinos dhe asaj në shtëpi kundër Anglisë.

Polonia dhe Hungaria janë skuadrat e tjera në Grupin I.

"Nëse vendet e tjera do ta pranonin një gjë të tillë do të ishte mirë që edhe Shqipëria ta pranonte kërkesën," tha ai.

Për muaj me radhë nuk ka pasur spektatorë në ndeshjet e futbollit në Shqipëri, ndërsa grumbullimet e më shumë se 10 personave janë të ndaluara.

Reja ka përfshirë për këto ndeshje shumë të rinj në skuadër, duke përfshirë mesfushorin Nedim Bajrami të FC Empoli, mbrojtësin Mario Mitaj të AEK Athinës, mesfushorët Enis Cokaj dhe Sherif Kallaku të Lokomotiva Zagreb si dhe Florian Kamberi të Aberdeen.

/a.m/NOA.al