Cila është pasaporta shëndetësore që do të rikthejë udhëtimet, pa pasur nevojë për karantinë
Transmetuar më 03-03-2021, 18:51

IATA, Shoqata Ndërkombëtare e Transportit Ajror, të cilës i përkasin 264 linja ajrore, po punon për të shpëtuar transportin ajror të prekur fatalisht nga pandemia me Travel Pass. Objektivi: të bëhet operative "pasaporta e udhëtimit" deri në fund të muajit. Ndryshe nga zgjidhjet e tjera, kjo risi shihet si më praktike pasi do të adoptonte të njëjtat parametra dhe do të kishte vlerë globale.

Për të pasur një “Travel Pass”, i cili do të shmangë karantinën, duhet të vaksinoheni ose të keni bërë tamponin, apo analiza të tjera që vërtetojnë se nuk jeni të infektuar me Covid-19. Integrimi i informacionit shëndetësor në formatin dixhital është opsioni më logjik, pasi do të përdoret kodi QR. Në thelb, kjo është pasaporta dixhitale për të cilën shpresohet të jetë e disponueshme në muajt e ardhshëm, e cila duhet të zbatohet përmes disa hapave në mënyrë që të zgjerohet mundësia e përdorimit të së njëjtës leje, përtej kërcënimit Covid-19, në një të ardhme të afërt.

Hapi i parë është krijimi i një regjistri që rendit laboratorët, klinikat, qendrat mjekësore ku do të jetë e mundur për ata që duan të marrin Udhëzimin e Udhëtimit. Udhëtarët duhet të kryejnë teste dhe vaksinime të njohura ndërkombëtarisht, në mënyrë që të respektojnë kërkesa të ndryshme nga kërkesa që kanë shtetet e ndryshme për hyrjen në territorin e tyre.

Kjo pasaportë do të përshpejtojë kontrollet si gjatë nisjes dhe mbërritjes në aeroporte të ndryshme, ashtu sikurse edhe me rastin e çdo ndalese, pa pasur nevojë të siguroni paraprakisht dokumente shëndetësore nga autoritetet e vendit që dëshironi të vizitoni për punë apo edhe turizëm. Hapi i dytë është aplikacioni Travel App (i disponueshëm falas për pajisjet iOS dhe Android).

Për të provuar iniciativën, IATA ka filluar një partneritet me Singapore Airlines, i cili që nga 23 dhjetori ka ofruar opsionin Travel Pass për fluturimet që nisen nga Kuala Lumpur dhe Xhakarta (me një listë të klinikave të zgjedhura në kryeqytetet e Indonezisë dhe Malajzisë, në të cilën duhet të testohet për koronavirus dhe të merret certifikata shëndetësore dixhitale për të udhëtuar).

Në javët e fundit, Etihad, Air New Zealand, Qatar Airways, Emirates dhe Malaysia Airlines gjithashtu kanë filluar testimin e aplikacionit që do të lehtësojë ndjeshëm udhëtimet./a.m/NOA.al