Një panel këshillimor ekspertësh i Administratës Amerikane të Ushqimit dhe Barnave (FDA) votoi të premten në favor të autorizimit të vaksinës me një dozë ndaj COVID-19 të kompanisë Janssen Biotech (Johnson & Johnson) për përdorim të ngutshëm, duke e afruar atë një hap më pranë shpërndarjes në Shtetet e Bashkuara.

FDA-ja pritet të autorizojë vaksinën për përdorim emergjent brenda orëve në vijim, duke e bërë atë vaksinën e tretë të disponueshme në Shtetet e Bashkuara dhe të vetmen vaksinë me vetëm një dozë.

Paneli i përbërë nga mjekë, ekspertë të sëmundjeve infektive dhe studiues të mjekësisë votuan unanimisht se përfitimet e vaksinës tejkalojnë rreziqet e saj tek njerëzit e moshës 18 vjeç e lart.

Kompania J&J ka thënë se do të jetë në gjendje të dërgojë tre deri në katër milionë doza të vaksinës javën e ardhshme nëse merr autorizimin e përdorimit emergjent, siç pritet.

Më shumë se 50 milionë doza vaksinash janë administruar në të gjithë vendin, një moment historik që u vu në dukje të enjten nga Presidenti Joe Biden.

Por shfaqja e varianteve shumë ngjitëse të virusit vetëm ka rritur urgjencën për të imunizuar qindra miliona njerëz më shumë ndaj një virusi që ka marrë jetët e më shumë se gjysmë milioni njerëzve në Shtetet e Bashkuara.

Kreu i Qendrave Amerikane për Kontrollin dhe Parandalimin e Sëmundjeve të premten shprehu shqetësimin se një rënie e kohëve të fundit në rastet e COVID-19 në Shtetet e Bashkuara mund të ndalet.

Në një provë klinike me 44.000 persona, vaksina e kompanisë J&J në përgjithësi ishte 66% efektive në parandalimin e rasteve të moderuara deri në ato të rënda të COVID-19, krahasuar me injeksionet e placebos.

Vaksinat me dy doza të prodhuara nga kompania Pfizer Inc në bashkëpunim me kompaninë BioNTech SE dhe nga kompania Moderna Inc ishin rreth 95% të efektshme në provat kryesore klinike. Ekspertët paralajmëruan që të mos bëhet shumë një dallim midis vaksinave sepse provat klinike kishin qëllime disi të ndryshme dhe më e rëndësishmja, studimet për vaksinat e Pfizer / BioNtech dhe Modernas ishin kryer para se të shfaqeshin variantet më ngjitëse të virusit në Afrikën e Jugut, Brazil dhe Mbretërinë e Bashkuar.

Prova klinike e kompanisë J & J ishte duke u zhvilluar kur variantet e reja po qarkullonin dhe madje po mbizotëronin në disa nga vendet ku u testua.

Gjithsesi, vaksina e saj ishte 100% efektive në parandalimin e shtrimeve në spital 28 ditë pas vaksinimit dhe nuk pati vdekje nga COVID-19 në radhët e personave që morën vaksinën.

Gjatë takimit, një drejtues i kompanisë J&J tha se kompania po zhvillonte një vaksinë të gjeneratës së dytë që do të synonte variantin shqetësues të Afrikës së Jugut dhe do të jetë gati për të filluar provat e Fazës 1 deri në këtë verë.

Vaksina e kompanisë J&J mund të ruhet në temperatura normale frigoriferike, duke e bërë shpërndarjen më të lehtë sesa për dozat e kompanive Pfizer / BioNTech dhe Moderna që përdorin teknologjinë RNA dhe transportohen të ngrira.

Vaksina e kompanisë J & J përdor një virus inaktiv të zakonshëm të njohur si "adenovirusi tip 26" për të futur proteina të koronavirusit në qelizat në trup dhe për të shkaktuar një përgjigje imune.

Aplikim dhe në Evropë 

Kompania farmaceutike amerikane Johnson & Johnson ka aplikuar për licensim në BE për vaksinën e Coronas. Agjencia Evropiane e Medikamenteve (EMA) do ta verifikojë produktin.

Pritet të bëhet një ekspertizë mbi të dhënat mbi efektivitetin, sigurinë dhe cilësinë e vaksinës, tha EMA. Autoriteti dëshiron të bëjë një rekomandim deri në mes të marsit.

Presidentja e Komisionit të BE Ursula von der Leyen u shpreh e kënaqur. Sipas saj, Komisioni do të japë lejen e përdorimit sapo të ketë një vlerësim pozitiv shkencor të EMA-s.

Vaksina e Johnson dhe Johnson ka një avantazh ndaj tri vaksinave të lejuara tashmë në BE: Në ndryshim nga produktet e Biontech/Pfizer-it, Moderna-s dhe Astra Zeneca-s, një dozë është e mjaftueshme për imunizim – preparati nuk duhet të injektohet dy herë.

Sipas prodhuesit, vaksina ka një efektshmëri prej më shumë se 66 përqind. Efektiviteti kundër sëmundjeve të rënda u dha me 85 përqind. Vlerat janë më të ulëta se ato të vaksinave të BioNTech/Pfizer dhe Moderna-s, por përsëri konsiderohen të mira.

Magazinimi dhe transporti janë gjithashtu më të lehtë. Komisioni i BE ka porositur 200 milionë doza të vaksinës Johnson & Johnson.

Rezultatet e vaksinës së re

J&J testoi vaksinën e parë me dozë të vetme tek 44,000 njerëz në SHBA, Amerikën Latine dhe Afrikën e Jugut. Për shkak të varianteve të ndryshme të virusit, që po qarkullojnë në vende të ndryshme, studiuesit analizuan rezultatet gjeografikisht. J&J njoftoi më parë se vaksina funksionoi më mirë në SHBA duke garantuar një efektivitet prej 72% ndaj rasteve të lehta e të rënda të COVID-19-s, krahasuar me 66% në Amerikën Latine dhe 57% në Afrikën e Jugut.

Megjithatë në çdo vend vaksina dëshmoi se ishte shumë efektive kundër simptomave të rënda dhe rezultatet e hershme të studimit treguan se nuk kishte asnjë shtrim në spital ose vdekje duke filluar 28 ditë pas vaksinimit.

Është arritje e madhe të fitosh 80% mbrojtje ndaj një sëmundjeje të rëndë. Mbrojtja më e mirë që ofron një vaksinë kundër gripit është 60%.

Si pritet të funksionojë vaksina?

Vaksina COVID-19 Janssen Biotech punon duke përgatitur trupin që të mbrohet kundër COVID-19. Kjo vaksinë përbëhet nga një virus tjetër (një adenovirus) që është modifikuar për të përmbajtur gjenin për krijimin e proteinave spike të SARS-CoV-2.

Kjo është një proteinë në sipërfaqen e virusit SARS-CoV-2 të cilës virusi i duhet për të hyrë në qelizat e trupit.

Pasi të jetë injektuar, vaksina sjell gjenin e proteinave spike të SARS-CoV-2 në qelizat në trup. Qelizat do të përdorin gjenin për të prodhuar proteinën spike. Sistemi imunitar i personit do ta njohë këtë proteinë si të huaj dhe do të prodhojë antitrupa. Po ashtu do të aktivizojë qelizat T (qelizat e bardha të gjakut) për ta sulmuar atë.

Nëse, më vonë, personi bie në kontakt me virusin SARS-CoV-2, sistemi i tij imunitar do të njohë proteinat spike në virus dhe do të jetë i gatshëm për të mbrojtur trupin kundër tij.

Adenovirusi në vaksinë nuk mund të riprodhohet dhe nuk shkakton sëmundje. Gjithashtu nuk e ndryshon ADN e trupit tonë.