“Të moshuarit e famshëm dhe historia komike e vaksinave”
Transmetuar më 23-02-2021, 17:07

OPINION NGA Mentor Kikia

Vaksinimi i disa të moshuarve që u emërtuan si të famshëm, nisi si një debat serioz për “rracizmin” e kryeministrit dhe përfundoi me replika komike.

Përse duhet të favorizohen disa të moshuar sepse janë të “famshëm”? Nga ndryshon një baba “i famshëm” nga një baba që ka punuar në treg?

Ka shumë pyetje që mund të bëhen dhe të gjitha të çojnë në një përfundim: Që para ligjit dhe Zotit të gjithë njerëzit janë të barabartë. Sepse për çdo familje, babai dhe nëna janë njësoj të shenjtë, pavarësisht nëse janë të shquar apo njerëz që kanë bërë një punë të zakonshme.

Dhe këtu mendoj se kanë argumenta pa fund ata që e kundërshtojnë idenë e kryeministrit.

Por mund të mbajë goxha argument edhe kundërta. Njerëzit janë vertët të barabartë para ligjit dhe Zotit, por në shoqëri nuk janë të barabartë. Shoqëria përbëhet nga shtresa, dhe ka një shtresë që shërben si lokomotivë e saj, e që quhet inteligjencë. Ata mund të jenë shkrimtarë, profesorë universitetesh, ekonomistë përkthyes, studiues, artistë, shkencëtarë… Padyshim që këta nuk mund të jenë të barabartë me të tjerët. Sepse kontributi i tyre në shoqëri nuk është i barabartë me të tjerët.

Në 1945, kur amerikanët pushtuan Gjermaninë Perëndimore, politikanët nazistë i dërguan në Nurenberg, ndërsa shkëncetarët nazistë i morën dhe i dërguan të ndërtojnë anijen kozmike që dërgoi njerëzit në hënë.

Unë e di se kur të përcjellim(sa më larg qoftë ajo ditë) për në botë tjetër Tinka Kurtin, Ismail Kadarenë, Reshat Arbanën, Dhimitër Anagnostin apo Margarita Xhepen, do të mbushim rrjetin me statuse vlerësimi e vajtimit. Deri atëherë, unë them të mos ia përgojojmë vaksinën që iu bë, apo iu premtua. Problemi, mendoj se nuk është nëse duhet të vaksinohen pa radhë nja 100 njerëz gjithsej, por kush do ta bëjë listën e “famshmëve”. Këtu fillon çdo problem i joni. Sepse ne dyshojmë për cdo gjë. Kush bën listën e kandidatëve për deputet, listën e atyre që fitojnë tenderat, listën e atyre që fitojnë bursa.. dhe në fund edhe listën e të moshuarve që fitojnë një vaksinë pa radhë. /a.m/NOA.al