Fotoja që emocionoi rrjetin/ Bora në Madrid bllokon rrugët, infermieri gjithsesi dorëzon vaksinën
Transmetuar më 09-01-2021, 22:18

Një foto në Madrid të Spanjës ka prekur gjithë rrjetin online për shkak të përmbajtjes së saj.

Pavarësisht dëborës së madhe një infermier shihet se si çan rrugën për të dorëzuar vaksinën. Publiku është paralajmëruar të qëndrojë në shtëpi teksa stuhia Filomena ka bllokuar shoferët dhe qarkullimin në të gjithë Madridin.

Autoritetet thanë se të paktën 4 njerëz kanë vdekur në stuhinë më të rëndë të dëborës në 50 vjet, teksa në kryeqytetin Madrid dhe rrethinat e tij është ndaluar qarkullimi dhe qindra shoferë janë bllokuar në makinat e tyre.

Stuhia Filomena goditi dje Spanjën, duke sjellë reshje dëbore, të papara në Madrid që prej vitit 1971, sipas zyrës vendore meteorologjike Aemet.

Stuhia kishte vazhduar gjatë natës duke u gdhirë e shtuna me rreth 50 cm dëborë në disa rajone të Madridit.