Alibeaj: Transparencë për 4 tenderët “sekretë” të Ministrisë së Shëndetësisë
Transmetuar më 07-04-2020, 11:22

Nga Ministria e Shëndetësisë nuk ka asnjë reagim për katër tenderët e klasifikuar “sekretë” në kundërshtim me ligjin. Kështu deklaroi ish-deputeti demokrat Enkelejd Alibeaj, duke thënë se këto tenderë nuk kanë lidhje me sigurinë kombëtare.

Sipas tij, blerja e mjeteve mbrojtëse për mjekët, pasi u zbulua skandali i maskave të skaduar, e aparateve respiratorë dhe e kiteve për testim gati 1 muaj pas identifikimit të rastit të parë me COVID 19 është bërë me procedurë sekrete.

“Duket e pabesueshme por me procedurë ‘sekret shtetëror’ është bërë edhe tenderi për trajtimin e mbetjeve spitalore. Pse janë klasifikuar sekret shtetëror këto tenderë? Çfarë fshihet pas tyre? Në vend që të bëjë transparencë, qeveria hesht. Edi Rama ka urdhëruar të mbahet sekret informacioni se sa lekë u harxhuan për tenderat urgjentë të Ministrisë së Shëndetësisë, si u përzgjodhën kompanitë fituese apo çfarë ofertash bënë ato”, u shpreh Alibeaj.

Ai shtoi se shqiptarët kanë të drejtë të dinë sesi po i përdor qeveria paratë e tyre, nëse këto para po përdoren mirë apo nëse me to po abuzohet dhe në këtë drejtim shtoi se pyetjet që kërkojnë përgjigje nga Edi Rama janë pyetje që i bën çdo qytetar që kërkon transparencë nga qeveria e tij janë:

– Pse Edi Rama nuk lejon të bëhen transparente procedurat për 4 tenderët e Ministrisë së Shëndetësisë?

– Sa është vlera e tenderave të shpallur sekret dhe kush ka paraqitur oferta?

-Ku e cenon sigurinë kombëtare transparenca për blerjen e respiratorëve, të kiteve për testim, të mjeteve mbrojtëse për stafin shëndetësor apo kush do të trajtojë mbetjet spitalore.

Në këtë linjë shtoi se shpallja sekret e 4 tenderëve të ministrisë së Shëndetësisë është e paligjshme. Shqiptarët kanë të drejtë të dinë çfarë fshihet pas procedurave që, padrejtësisht, mbahen sekret.

Por Alibeaj shtoi se ajo që tërheq vëmendjen nga shpallja e fituesve është se kompani pa përvojë paracaktohen për të përfituar nga epidemia.

“Njësoj si në rastin e kompanisë maqedonase të kompjuterave që mori tenderin e ushqimeve të Ministrisë së Mbrojtjes, edhe në tenderin e klasifikuar sekret të Ministrisë së Shëndetësisë ka fituar një kompani antenash televizive. “TBS 96” është e njëjta kompani që u përdor për shitjen e dekoderave për qytetarët me përkrahje sociale dhe që vetëm para pak kohësh ka shtuar si aktivitet të saj materialet dhe pajisjet mjekësore. Nëse qeveria këmbëngul të mbajë sekret një aferë duke mos lejuar transparencën, Kontrolli i Lartë i Shtetit dhe SPAK-u e kanë për detyrë të bëjnë transparencë. Ato duhet të verifikojnë, të hetojnë dhe të çojnë para drejtësisë këdo që vjedh paratë e shqiptarëve në ditën më të vështirë”, tha Alibeaj.

Ai bëri thirrje që për SPAK-un e sapokrijuar për të luftuar korrupsionin është e pafalshme heshtja apo infektimi nga virusi i kontrollit prej Kryeministrit. /a.y/noa.al

Loading...