Është publikuar në Fletoren Zyrtare vendimi i shumëpritur që sqaron se si do të kompensohen të punësuarit/vetëpunësuarit, aktiviteti i të cilëve është mbyllur për shkak të situatës së krijuar me Covid-19.

Vendimi sqaron se përfituesit e ndihmës financiare janë individët e vetëpunësuar/të punësuar në subjektet me të ardhura vjetore deri 14 000 000 (katërmbëdhjetë milionë) lekë për vitin 2019, sipas kategorizimit të mëposhtëm: a) Personat fizikë të vetëpunësuar; b) Punonjësit e papaguar të familjes të personit fizik tregtar; c) Të punësuarit në personat fizikë tregtarë; ç) Të punësuarit në personat juridikë.

Në vendimin e qeverisë thuhet se për të përfituar ndihma financiare, subjekti duhet të ketë përgjegjësi tatimore për tatimin e thjeshtuar mbi fitimin dhe tatimin mbi fitimin. Të ardhurat e deklaruara të të cilit, sipas deklaratës së tatimit mbi fitimin/tatimit të thjeshtuar mbi fitimin, për vitin 2019, të jenë deri 14 000 000 (katërmbëdhjetë milionë) lekë.

Një tjetër kusht është që subjekti tatimpagues duhet që së pari të ketë ndërprerë aktivitetin në zbatim të urdhrave përkatës të ministrit së Shëndetësisë dhe Mbrojtjes Sociale (MSHMS), të nxjerra për këtë qëllim.

Kjo do të thotë që kompensim do të marrin vetëm subjektet që janë pjesë e aktiviteteve ekonomike të mbyllura. Nëse subjektet e kanë mbyllur biznesin, por nuk janë pjesë e listës, atëherë ata automatikisht nuk kompensohen.

Më herët, tatimet kanë publikuar, bazuar në vendimin e Ministrisë së Shëndetësisë, listën e aktiviteteve që mbyllen dhe atyre që lejohen.

Duke filluar nga data 24 Mars 2020, nuk do te lejohet ushtrimi i aktiviteteve të njësive të shitjeve të përcaktuara në tabelën më poshtë të cilat janë shënuar me ngjyrë të kuqe dhe kanë statusin “Mbyllen”

Ndalohet ushtrimi i aktiviteteve në ambiente që ofrojnë shërbime, lokale nate, ambiente të mbyllura të dedikuara për argëtimin e fëmijëve dhe të rinjve, aktivitete palestra, qendra sportive, pishina, qendra interneti, qendra kulturore dhe qendra argëtimi, të njësive të shitjeve në të gjitha Qendrat Tregtare si dhe çdo njësie tjetër që kryhen shitje me pakice te artikujve: industrial, kulturor, veshjeve te llojeve te ndryshme, mallrave artistike, sportive dhe kozmetike, shkruan ‘monitor’.

Do te lejohen te vazhdojnë ushtrimin e aktivitetit të gjithë tatimpaguesit që kryejnë aktivitet në fushën e prodhimit bimor dhe shtazor, përpunimin e produkteve ushqimore, prodhimeve te drurit, prodhimit te tekstileve, prodhimit te produkteve kimike, produkteve farmaceutike, prodhimit te mineraleve, prodhimi i produkteve elektronike, prodhimi i produkteve elektrike,prodhimi i mobilieve, prodhimi i energjisë, prodhimi dhe furnizimi me ujë, si dhe shërbimet e pastrimit, ndërtimit të ndërtesave, punimeve inxhinierike etj.., të përcaktuara në tabelën më poshtë të cilat kanë statusin “Lejohen”.

Në listë, nga 140 aktivitete ekonomike, vetëm 34 e kanë të ndaluar aktivitetin (shiko dhe listën në fund), ndërsa pjesa tjetër, që nuk është pjesë e aktiviteteve të ndaluara, nuk përfiton kompensim për punonjësit.