Reforma Zgjedhore/ Bardhi: Rama tallet me standardet e OSBE-ODIHR e të Bundestagut
Transmetuar më 07-11-2019, 15:56

Kryesuesi i Grupit të Punës së Opozitës të Bashkuar Gazmend Bardhi me anë të një deklarate për mediat shprehet se Edi Rama nuk ka ndërmend që të bëjë një reformë zgjedhore, e cila të jetë në përputhje me standardet e OSBE-ODIHR apo të Bundestagut.

Bardhi shprehet se Rama përkundrazi tallet me standardet e OSBE-së dhe të Bundestagut, ndërsa me propozimet e bëra, ai kërkon sërish që të ketë nën kontroll sistemin zgjedhor në vend.

“Edi Rama nuk ka ndërmend të bëjë një reformë zgjedhore që garanton lirinë e votës, por vetëm të tallet me OSBE/ODIHR, me Bundetsgun, me shqiptarët. Ai synon të sanksionojë me ligj standardin e 30 Qershorit, ku administroi i vetëm procesin. Këtë qëllim ka edhe propozimi i PS që administrimin e zgjedhjeve ta bëjnë punonjësit nën varësinë e Edi Ramës”, shprehet Bardhi.

Më tej ai shton se, “Administrata publike është e pabesueshme për të administruar një proces zgjedhor me standarde europiane. Raporti i ODIHR-it ka provuar se punonjësit e administratës janë nën presion politik, si dhe është bërë e qartë se ajo është e mbushur me militantë të Partisë Socialiste. Përgjimet e dosjes 339 në Durrës dhe 184 në Dibër kanë sjellë fakte të pamohueshme se administrata, në kundërshtim me ligjin, është në shërbim të Edi Ramës, në përmbushje të objektivit për të vjedhur zgjedhjet”.

Sipas Bardhit, “Propozimi i Edi Ramës që zgjedhjet t’i administrojnë vartësit e Edi Ramës në shërbimin publik, do të thotë që zgjedhjet të lihen në dorë të Arben Keshit, i cili u përfshi në masakrën elektorale në Dibër, ndërsa ishte Drejtor në Ministrinë e Brendshme; në dorën e Ivo Docit, përgjegjësit të Ujësjellësit, i cili urdhërohej nga Avdylajt për të identifikuar punonjësit që votonin për PD dhe t’i kërcënonte ata me largim nga puna. Lista bëhet e gjatë me dhjetëra e qindra raste të identifikuar edhe nga OSBE/ODIHR, që provojnë se kjo është një administratë thellësisht e politizuar”./b.l/noa.al/

Loading...
Loading...