Transmetuar më 30-10-2019, 16:32

Presidenti i FSHF, Armand Duka premtoi se ndeshja 17 Nëntorit kundër Francës do të luhet në “Arenën Kombëtare”, ku edhe do të bëhet inaugurimi i stadiumit.

Por është UEFA që vendos dhe pas inspektimit, çdo gjë është vënë në pikëpyetje.

Askush nuk mund ta thotë me siguri nëse sfida e fundit e grupit eliminator me kampionët e Botës do të luhet në  stadiumin e sapo papërfunduar.

Gjatë inspektimit të fundit, të dërguarit e UEFA-s kanë pasur shumë kritika dhe kanë vendosur disa detyra emergjente ndaj njerëzve përgjegjës për finalizimin e punimeve.

Pas disa orëve inspektim në stadium, ata janë larguar duke konfirmuar se do të kërkojnë periodikisht raporte për "detyrat e shtëpisë" që duhet të bëjë pala shqiptare, para se të vendoset nëse ndeshja duhet të luhet në "Arena Kombëtare".

Problemet më të mëdha lidhen me çështjet teknike që kanë të bëjnë me prodhimin e sinjalit, transmetimin e ndeshjes dhe akomodimin e komentatorëve e gazetarëve.

Sipas të dërguarve të UEFA-s, pozicionet e kamerave të transmetuesve të ndeshjes duhet të zhvendosen një kat më poshtë për të siguruar një pamje më të plotë, por me të njëjtën arsye duhen zhvendosur edhe vendet e komentatorëve të sfidës.

Probleme janë evidentuar edhe në pozicionet ku do të akomodohen gazetarët në pjesën e tribunës pasi jo të gjithë reporterët do të kenë fushëpamje të plotë. UEFA kërkon që gazetarët të akomodohen në vende sa më komode dhe me pamje sa më të qartë të fushës së lojës.

Të gjitha modifikimet duhet të bëhen brenda disa ditësh.

Nga UEFA nuk është marrë ende një vendim përfundimtar nëse me kampionët e Botës më 17 Nëntor do të luhet në “Arenën Kombëtare”. UEFA nuk ka lënë një afat dhe bëhet fjalë që të gjitha modifikimet lidhen ekskluzivisht vetëm me ndeshjen kundër kampionëve të botës, sepse më pas është gjithë koha e nevojshme për të rregulluar çdo detaj.

Gazetarët francezë, të pranishëm gjatë këtij inspektimi, kanë pranuar se në ndeshjen inauguruese, përveç presidenti të UEFA-s, Alexander Ceferin, mund të jetë i pranishëm edhe presidenti i Francës, Emmanuel Macron. Ishte folur se Macron ka gjasa të vijë së shpejti dhe në këtë rast jo për vizitë zyrtare, por mund të përfitojë nga rasti që të japë edhe një mesazh për dy vendet e Ballkanit Perëndimor, Shqipërinë dhe Maqedoninë e Veriut, pas vetos që vendosi Franca për bllokimin e tyre në BE.

Nisur nga interesi i lartë dhe rëndësia e ndeshjes, autoritetet shqiptare janë duke bërë të pamundurën për të plotësuar të gjitha kushtet e vendosura nga UEFA, që ndeshja me Francën të luhet në stadiumin që meriton një përballje e tillë./NOA.al