Vjosa Osmani kandidate për kryeministre? VV: Albini është politikani më i votuar në Kosovë
Transmetuar më 27-08-2019, 20:30

Pas shpalljes së zgjedhjeve të parakohshme në Kosovë, Lidhje Demokratike e Kosovës dhe Lëvizja Vetëvendosje kanë biseduar për një koalicion të mundshëm parazgjedhor.

Por duket se me kandidimin e Vjosa Osmanit për kryeministre, ky bashkëpunim ndërmjet tyre së paku para zgjedhjeve ka marrë fund.

Kështu ka bërë me dije ish-deputeti i Vetëvendosjes, Xhelal Sveçla.

“Vetëvendosja bëri maksimumin, duke mos paragjykuar as emrin e kandidatit për kryeministër, në mënyrë që gjithçka të vendosej së bashku nga VV e LDK, por me vendimin e pakoordinuar dhe tinëzar për të nxjerrë kandidat për kryeministër, LDK tregoi se nuk dëshiron koalicion parazgjedhor”, ka shkruar Sveçla në profilin e tij në Facebook.

“Kjo sjellje e LDK vazhdon qysh prej një viti, me hezitim e mos-sinqeritet përballë kërkesave transparente e publike të VV për bashkëpunim. Dhe është pikërisht kjo tinëzari e LDK që e ka zvogëluar këtë subjekt 10% më pak në sondazhe brenda një viti, ndërkohë që ka rritur VV me të njëjtën margjinë”.

“Tash, mbetet të shpresojmë që të paktën e mbajnë fjalën për të shkuar në zgjedhje vetëm”.

“Populli ka marrë vendimin për ndryshim, Vetëvendosje prin, Albini është politikani më i votuar dhe më i mbështetur”.

E duke qenë të vendosur që pozita e kryeministrit t’i takojë LDK-së, Osmani tha se fokusi për një bashkëqeverisje është me Lëvizjen Vetëvendosje dhe se në ditët në vijim do të vazhdojnë diskutimet bashkërisht.

"Vetëvendosje duhet t’i bashkohet LDK-së në ndërtimin e një epoke të re të ndryshimeve të mëdha, të cilat do të jenë historike dhe që do e çkapin shtetin nga krimi dhe korrupsioni", tha ajo.

Lidhur me deklarimet e Xhelal Sfeçlës, i cili e ka quajtur tinëzare LDK-në, Vjosa Osmani tha se deklaratat e tilla tregojnë se VV nuk ka pasur bashkëpunim të sinqertë dhe shpreson se ato mendime të mos të jenë edhe të lidershipit të saj./a.m.noa.al

Loading...
Loading...