Transmetuar më 17-06-2019, 21:59

Ish-ministri i Partisë Socialiste, Damian Gjiknuri ka reaguar pas përgjimeve të publikuara sot nga gazeta gjermane “Bild”.

Nëpërmjet një reagimi në rrjetet sociale, Gjiknuri shprehet se në komunikimin e tij nuk ka asnjë veprim që bie ndesh me ligjin, ndërsa shton se çdo interpretim apo deduksion tjetër bëhet për qëllime të pastra politike.

Sipas Gjiknurit, ky spekulim është i qëllimshëm dhe synon të njollosë fitoren e merituar të kandidatit të Partisë Socialiste dhe punën organizative të koordinatorëve të saj.

“Referuar publikimeve të fundit në media rreth procesit zgjedhor në Bashkinë e Peshkopisë në vitin 2016, me synim transparencën dhe hedhjen poshtë të spekulimeve të qëllimshme sqaroj se për periudhën për të cilën bëhet fjalë kam mbajtur funksionin e drejtuesit politik të PS në Qarkun Dibër. Në bisedat e mia telefonike të publikuara audio në gjuhën shqipe, nuk ka asnjë veprim që bie ndesh me ligjin apo shkon përtej komunikimit normal organizativ mes shtabit elektoral në një fushatë. Çdo pretendim tjetër është deduksion politik i qëllimshëm, madje edhe transkriptim dhe koment i pavërtetë në raport me atë çka thuhet me zë prej meje apo asaj çka përfaqësojnë bashkëbiseduesit. Natyrisht, ky spekulim bëhet qëllimshëm për të njollosur fitoren e merituar të kandidatit të Partisë Socialiste dhe punën organizative të të gjithë kordinatorëve elektoral ashtu dhe timen si drejtues politik”, shkruan Gjiknuri.

Ai vijon më tej në reagimin e tij duke shkruajtur:

“Duke qenë se çështja është në hetim nga prokuroria nuk është normale që unë të flas me detaje për këtë proces. Mbështes dhe inkurajoj prokurorinë të hetojë çdo element, pretendim apo qoftë dhe indicie për veprimtarinë e kujtdo përfaqësuesi të Partisë Socialiste të angazhuar në këtë proces zgjedhor. Gjithashtu, publiku duhet të dijë se si ka mundësi që Prokuroria e Krimeve të Rënda në atë kohë, ka përfshirë në përgjim të gjithë shtabin elektoral të PS me vetëm një kallëzim nga subjekti kundërshtar Partia Demokratike, madje e ka regjistruar hetimin për korrupsion dhe jo për shitblerje votash!?”

Në përgjimet e publikuara sot nga gazeta e përditshme gjermane Bild rezulton edhe një bisedë telefonike midis ish-ministrit Damian Gjiknuri dhe zyrtarin e ministrisë së Brendshmë, Arben Keshi.

Gjiknuri i thotë Keshit që të mos bëhet merak lidhur me disa vëzhgues të panjohur që ky i fundit i komunikoi se kishin mbërritur, pasi ishin marrë masat që të dërgoheshin disa “Çuna gangsterë".

Pjesë nga biseda:

Damian Gjiknuri: Ca bëhet

Keshi: Hiç, asgjë Naj marak naj gjë.

Keshi: Po do të vijnë këtë deputetët.

Gjiknuri: Kanë qenë pa gjumë. Po do vijnë mo, ja do vijnë tashi.

Keshi: Vijnë ca vëzhgues nga rrethet nga ata të tjerët që se di se kush janë.

Gjiknuri: E di mo ashtu e di, ashtu bëjnë ata. Unë do të çoj edhe ca çuna gangstera që të të duhen për çdo rast, të mos dalin shumë se janë nga ata tipat problematikë por gjithsesi të jenë aty për çdo rast./a.k/noa.al/