Tërmeti në Korçë, Basha: Të shpallet gjendje e jashtëzakonshme
Transmetuar më 01-06-2019, 17:12

Kreu i PD-së Lulzim Basha ka reaguar përmes një postimi në twitter, lidhur me dëmet e shkaktuara nga tërmeti në Korçë. Basha kërkon të shpallet gjendje e jashtëzakonshme për ndihmë ndaj familjeve të goditura.

“Qindra banesa janë dëmtuar nga tërmeti që goditi në orët e para të mëngjesit rajonin e Korçës. Shumë banorë kanë mbetur në qiell të hapur dhe qindra të tjerë janë në panik se çfarë do të ndodhë me banesat e tyre. Gjithçka kishin ndërtuar me sakrificë të madhe është shkatërruar”, shkruan Basha ndërsa poston foto nga dëmet e shkaktuara nga lëkundjet e tërmetit.

Më tej ai shton se, “Duhet shpallur menjëherë gjendja e jashtëzakonshme në zonën e goditur dhe duhen dedikuar urgjent fonde për shtëpitë e dëmtuara. Familjeve të mbetura në mes të katër rrugëve dhe në gjendje tronditje dhe pamundësie totale shteti duhet t’ju ofrojë menjëherë ndihmë financiare dhe ushqim e strehë.

Nuk duhet humbur asnjë çast për shkak të  paaftësisë apo lojrave politike, por duhet vepruar menjëherë dhe me veprime konkrete për të ndihmuar banorët e goditur. Familjeve të mbetura në mes të katër rrugëve dhe në gjendje tronditje dhe pamundësie totale, shteti duhet t’u ofrojë menjëherë ndihmë financiare dhe ushqim e strehë”./b.l/noa.al/

Loading...
Loading...