Komuniteti ndërkombëtar po intensifikon thirrjet pjesëmarrësve në protestat e lajmëruara për tu mbajtur në Tiranë, të përmbahen nga të gjitha format e dhunës dhe të qëndrojnë larg nga ngjarje të dhunshme e njëkohësisht i bën thirrje të gjithë udhëheqësve politikë që të tregojnë përgjegjësi dhe vetë kontroll.

Një letër e firmosur nga eurodeputetët Kukan dhe Fekenshtain, të cilën noa.al jua sjell më poshtë të plotë, ndalet në zhvillimet e fundit në Shqipëri.

"Të dashur Miq, Ne, si anëtarë të Parlamentit Evropian kemi mbështetur prej vitesh procesin e integrimit të Shqipërisë në BE dhe përparimin e vendit në reformat përkatëse.

Ne jemi miq të Shqipërisë dhe jemi të bindur qe vendi juaj ofron një vlere te shtuar për Bashkimin Evropian.

Kjo është arsyeja pse ne do të vazhdojmë mbështetjen tonë për integrimin e Shqipërisë në BE edhe në të ardhmen.

Por me shqetësim të madh kemi parë imazhet e dhunës në Tiranë të shtunën e kaluar, më 11 maj.

E drejta për të protestuar është thelbësore në çdo shoqëri demokratike, por kjo kurrë nuk e bën  dhunën një instrument te ligjshëm.

Ne, deputetët e Parlamentit Evropian, anëtare te familjeve të ndryshme politike evropiane, u bëjmë thirrje të gjithë pjesëmarrësve në protestat e lajmëruara për ditët e ardhshme në Tiranë, të përmbahen nga të gjitha format e dhunës dhe të qëndrojnë larg nga ngjarje të dhunshme.

Ne gjithashtu u bëjmë thirrje të gjithë udhëheqësve politikë që të tregojnë përgjegjësi dhe vetëkontroll.

Si deputetë të Parlamentit Evropian, ne nuk synojmë interferimin në ngjarjet në vend.

Duam thjesht t’ju kujtojmë se vetëm institucionet dhe proceset demokratike, dialogu parlamentar, procedurat ligjore, zgjedhjet e lira dhe të drejta – janë rruga e vetme përmes te cilës shoqëria shqiptare mund të zgjidhe sfidat serioze që përjeton.

Detyra jonë si deputetë të Parlamentit Evropian është të inkurajojmë përparimin e bërë nga Shqipëria dhe të mbështesim vendin në rrugën e tij drejt integrimit evropian.

Për ketë arsye, e ndjejmë të nevojshme për t’ju drejtuar juve, qytetarëve shqiptarë.

Prandaj, kemi besim dhe presim nga ju, nga qytetarët shqiptare dhe nga shoqëria civile që të punojmë se bashku për të çuar përpara qëllimin tonë të përbashkët.

Pamjet e së shtunës së kaluar mund të japin përshtypjen e gabuar se vendi juaj nuk është gati për hapjen e negociatave me Bashkimin Evropian në qershor të këtij viti.

Qytetarë te Shqipërisë dhe anëtare të shoqërisë civile: Si miq të Shqipërisë dhe përkrahës të integrimit të saj në BE, ju bëjmë thirrje të bëheni pjese e zgjidhjes dhe te jepni kontributin tuaj për të ndaluar dhunën” .

Është koha e duhur që t’i dërgoni botës një mesazh të qartë se Shqipëria dhe shqiptarët janë të aftë për t’i zgjidhur konfliktet e tyre në mënyrë paqësore dhe demokratike", – përfundon deklarata e eurodeputetit Knut Fleckenstein dhe raportuesi i PE për Shqipërinë Eduard Kukan.