Zhbllokohet buxheti i Bashkisë Skrapar
Transmetuar më 13-03-2019, 15:52

Kreu i bashkisë së Skraparit, Nesim Spahiu ka dhënë lajmin e mirë për të gjithë qytetarët e kësaj bashkie. Përmes një postimi në Facebook, Nesim Spahiu shprehet se është zhbllokuar buxheti i bashkisë për vitin 2019.

Ai falënderon Ministrisë e Financave që mundësoi vijimin e Veprimtarisë Financiare me 1/12 e buxhetit Faktik si dhe banorët për përkrahjen.

“Të nderuar banorë të Skraparit!  Më lejoni të ndaj me ju, lajmin e mirë se situata e Buxhetit për vitin 2019 për Bashkinë tonë mori një zgjidhje. Duam të falenderojmë edhe Ministrinë e Financave dhe Ekonomisë që më në fund, mundësoi vijimin e Veprimtarisë Financiare me 1/12 e buxhetit Faktik të vitit paraardhës duke respektuar ligjin.

Mirënjohje dhe Falenderim ndaj çdo banori të Skraparit që na ka përkrahur e mirëkuptuar gjatë gjithë kësaj kohe. Kryetari i Bashkisë Skrapar Nesim Spahiu.”- ka shkruar kreu i bashkisë Skrapar Nesim Spahiu.

Buxheti i bashkisë së Skraparit nuk u miratua në dhjetor për shkak të votës kundër nga këshilltarët e majtë, të cilët e rrëzuan me pretendimin se në këtë bashki ka më shumë punonjës krahasuar me numrin e banorëve.

Më 18 shkurt Bashkia Skrapar mbylli disa shërbime, si çerdhe, konviktin e nxënësve apo dhe Qëndrën e Fëmijëve me Aftësi Ndryshe, Shërbimin e Pastrimit dhe gjithë shërbimet për shkak të mungesës së lekëve.