Drenica hyn në Librin e Rekordeve Guinnes, ja vajza që e bëri të mundur
Transmetuar më 26-01-2019, 13:31

Gjatë ditës së sotme në komunën e Skenderajt u nda çertifikata e hyrjes në Librin e Rekordeve Guinnes, ku kjo komunë ka hyrë nëpërmjet punimit të lules më të madhe në botë të stilit Origami e të punuar nga Arbnora Fejza Idrizi.

Kryetari i Komunës së Skenderajt, Bekim Jashari, tha se tani e tutje Drenica do të njihet jo vetëm për trimëri por edhe për talent.

Ndërkaq Arbnora Fejza Idrizi, autorja e punimit, u shpreh me shumë emocione, duke thënë se është krenare që arriti ta përfaqësojë Skenderajn dhe Kosovën.

Ajo shpjegoi se punimet e luleve Origami janë të njohura vetëm në Japoni dhe Kinë por ajo ka arritur që të përmbushë synimet e saj dhe të realizojë lulen.

Ajo ka punuar një lule origami me diametra 13 metra me 13 dhe 168 metra katrorë.

Ajo po ashtu tha se po punon në një rekord të ri, për vazon më të madhe në botë me lule të punuara nga flamuj që kanë njohur shtetin e Kosovës.

“Iu them të rinjve mos u dorëzoni sepse me punë të gjitha ëndrrat mund të realizohen”, tha ajo.