Refuzimi i Gent Cakajt si MPJ, konstitucionalisti Gjata: Vendim kushtetues, Meta autoritar
Transmetuar më 10-01-2019, 13:56

Konstitucionalisti Çlirim Gjata thotë se refuzimi i emërimit të Gent Cakajt si ministër i Jashtëm nga ana e presidentit Ilir Meta dëshmon se nuk është rast që mund të cilësohet si lojë politike, pasi është ndërmarrë me të drejtë kushtetuese e ligjore.

Duke folur sot për Report Tv, Gjata cilësoi se presidenti i Republikës, Ilir Meta ka shkuar shumë më tej me këtë vendim, pasi kësaj radhe vendimi i tij karshi Cakajt është bërë publik.

“Ai person mund të jetë i ndershëm por ama duhet ndjekur rruga shtetërore dhe këtë gjë bëri edhe presidenti Ilir Meta. Më në fund po shohim një president që po sillet me autoritet”, u shpreh më tej ai.

Konstitucionalisti përmendi edhe kriterin kryesor për të cilën hodhi poshtë propozimin e kryeministrit Rama, certifikatën e sigurisë, që Cakaj e mori tre ditë pas firmosjes së propozimit për detyrën e re.

“Figurat shtetërore gëzojnë atë që quhet certifikatë sigurie sepse shtetet kanë marrëdhëniet e veta midis radhëve të tyre, në kuptimin që mund të marrin vesh ose kanë të drejtë të dinë sekrete të ndryshme, por ama të mos dalë jashtë zyrave. Nuk bëhet fjalë për një certifikatë civile”, komentoi Çlirim Gjata.

Gjata renditi si argument edhe qëndrimin e Cakajt përkundrejt kufirit territorial Kosovë-Serbi.

“Presim që në qershor të hapim negociatat me Bashkimin Evropian. Është një moment mjaft delikat. Ai deklaroi se duhet parë rishikimi i kufirit territorial Kosovë-Serbisë, është një deklaratë mjaft e rrezikshme. Ndonëse propozimi i  tij bie poshtë, deklarata mbetet. Nëse duhet të hyjmë në Europë, duhet të jemi seriozë”, u shpreh konstitucionalisti.