PD: Narkopolicia të mos guxojë të prekë studentët, ligji e ndalon
Transmetuar më 10-01-2019, 13:17

“Në një akt të denjë për diktaturat ushtarake, policia është futur me urdhrin politik të Edi Ramës në mjedise universitare me qëllim për të ndaluar protestën e studentëve”.

Është ky denoncimi i bërë ditën e sotme nga deputetja demokrate Albana Vokshi.

Ajo tha se fakultete të ndryshme në vend janë bërë skenat e një regjimi që, pasi nuk i sundoi dot studentët me propagandë dhe mashtrime, tani shkel hapur Kushtetutën dhe ligjin për të nënshtruar studentët me presion policor brenda universiteteve.

Në emër të PD, ajo dënoi me ashpërsi këtë akt të paprecedentë në Shqipëri sipas saj, dhe paralajmëroi të gjithë ata që urdhërojnë presionin policor ndaj studentëve se herët apo vonë do të përgjigjen para ligjit.

Deputetja demokrate tha se narkopolicia nuk duhet të guxojë të prekë studentët paqësorë dhe as të dhunojë mjediset universitare.

Sipas saj, ligji për Arsimin e Lartë e ndalon rreptësisht hyrjen e policisë në fakultete, përveçse kur prania e tyre kërkohet nga drejtuesit në rastet e krimeve flagrante dhe se ligji siguron ndëshkimin për “cenimin e paprekshmërisë së institucioneve të arsimit të lartë”.

Ajo tha se deri tani, organet e drejtësisë nuk kanë ndërmarrë asnjë veprim për të ndëshkuar shkeljen e hapur të paprekshmërisë territoriale të universiteteve nga narkopolicia politike e Edi Ramës.

“Gjithashtu, Partia Demokratike dënon deklaratën kërcënuese të policisë, të shkruar nga Edi Rama, dhe paralajmëron kryeministrin dhe veglat e tij në polici se do të paguajnë për kërcënimet e tyre për arrestimin apo ndjekjen penale të studentëve. Ne nuk do të harrojmë askënd që shkel ligjin për llogaritë politike kriminale të Edi Ramës”, u shpreh Vokshi.

Në këtë linjë shtoi se prania e paligjshme e policisë në universitete shënon fundin e propagandës së Edi Ramës, i cili çdo ditë e më shumë po përdor shtetin policor kundër kujtdo që i rrezikon pushtetin.

Duke përgëzuar të gjithë pedagogët që janë solidarizuar me protestën për një kauzë të drejtë të studentëve, ajo tha se vërehet me keqardhje që në disa fakultete, drejtues të lartë dhe pedagogë janë vënë në shërbim të qeverisë, duke ushtruar presione nga më të ndryshmet mbi studentët: duke i kërcënuar me mungesa, me ngelje në provime apo djegie diplome.

Vokshi deklaroi se PD i dënon me forcë këto presione dhe i fton pedagogët të mos i shërbejnë një pushteti kriminal kundër interesave të studentëve dhe se Partia Demokratike mbështet plotësisht protestën e studentëve deri në përmbushjen e çdo pike të kërkesave të tyre.

“Partia Demokratike do të anulojë ligjin e arsimit të lartë e do ta bëjë arsimim prioritet kombëtar”, deklaroi në mbyllje Albana Vokshi. /a.y/noa.al

Studentët vijojnë bojkotin, ngujohen brenda fakulteteve