Kryeministri Rama ka komentuar vendimin e Presidentit Meta për të dekretuar Sandër Lleshin ministër të Brendshëm.
Përmes Twiterit, kreu i qeverisë shprehet se “dekretimi i Sandër Lleshit ministër i brendshëm, një shembull kuptimplotë i faktit se edhe kur duket, sikur krisjet janë të pariparueshme a thyerjet të pashmangshme, ka gjithmonë një rrugëzgjidhje nëse ka #VullnettëMirë Ministri i ri njeriu i duhur në vendin dhe kohën e duhur”.
Presidenti Meta ka dekretuar emrin e Sandër Lleshit si ministër të Brendshëm mbrëmjen e sotme, që përkonte edhe me përfundimin e afatit ligjor.
Vendimi vjen pak orë pasi kreu i shtetit dekretoi edhe nxjerren në lirim të oficerit me gradë madhore, gjeneral.
Emri i tij prodhoi përplasjen e parë mes presidencës dhe kryeministrisë, e cila nuk shkoi deri në krisje, siç theksoi kreu i qeverisë.
Po ashtu, kjo ishte edhe hera e parë që një president nuk dekreton propozimin e një kryeministri për ministër.
Gjithsesi gjithçka ka përfunduar me këtë dekret, teksa pritet që zv.ministri Lleshi të marrë postin e kreut të ministrisë së Brendshme. /k.k/noa.al/