Pas ekzekutimit mafioz të ndodhur ditën e djeshme, ku mbeti i vrarë Fatos Ferracaku dhe u plagos shoku i tij Fatmir Mehaj, kanë mbërritur në Shkodër zyrtarë të lartë të policisë dhe Prokurorisë së Krimeve të Rënda.

Mësohet se në Shkodër qysh prej pasdites së djeshme ka shkuar drejtori i krimeve Niko Brahimi, drejtor për rendin Gjovalin Loka dhe nga Krimet e Rënda një prokuror i posaçëm.

Po ashtu po administrohen prova të cilat mund të ndihmojnë për të zbardhur dinamikën e ngjarjes. Gjithçka për të hedhur dritë mbi atentatin e një dite më parë, ku autorët e ngjarjes pas ekzekutimit u zhdukën pa gjurmë.

40-vjeçari Fatos Ferracaku u qëllua për vdekje në kokë dhe në gjoks, ndërsa miku i tij Fatmir Mehaj me të cilën ndodhej në një lokal në lagjen “Partizani”, në vendin e quajtur ‘Merkata Rus”, mbeti i plagosur në kofshën e këmbës, teksa ndërhyri për të parandaluar ngjarjen.

Bazuar në dëshmitë e marra nga policia, rezulton se kanë qenë dy persona me motorë dhe me skafandra në kokë ata që kanë bërë atentatin.

Njëri ka qëndruar në motor, ndërsa tjetri i veshur me xhup të kuq me të bardhë dhe me skafandër të kuqe në kokë, ka zbritur për të kryer atentatin.

Pasi e ka qëlluar Ferracakun nga një distancë prej disa metrash, ai është afruar dhe e ka qëlluar në kokë, duke u siguruar që e kishte kryer ekzekutimin.

Atentatori është ka hipur me shpejtësi në motor dhe ka qëlluar në ajër, duke tentuar të mbajë larg personat që ndodheshin në zonë.

Sakaq një motor ngjyrë gri tip “TMAX” 550 kubik, me shpejtësi të madhe, është gjetur i djegur pak pas krimit në lagjen “Guerrile”, i cili mendohet se është përdorur nga autorët.

Një efektiv policie i cili në momentin e ngjarjes ishte civil ka tentuar që të ndjekë autorët por pa rezultat, për shkak të largimit me shpejtësi të madhe.

Bazuar në dëshmitë e marra atentatori poshtë skafandrës ka pasur edhe kapuç të zi të çarë vetëm në pjesën e syve, çka nuk lejonte identifikimin e tij, ndërsa drejtuesi i motorit ka qenë me skafandër në kokë.

Paraprakisht dyshohet se ekzekutimi është kryer nga një vrasës profesionist, duke pasur parasysh saktësinë e ekzekutimit dhe mënyrën e veprimit. /a.y/noa.al

Një i vrarë dhe një i plagosur në Shkodër, rindërtohet skena e krimit

I shtrirë në tokë dhe i gjakosur, pamje të rënda nga atentati në Shkodër

Viktima e atentatit në Shkodër u qëllua me plumb në kokë, lidhja me ekzekutimin e kushëririt

Viktimës së atentatit në Shkodër, në shtator i vranë kushëririn

Një i vrarë dhe një i plagosur në mes të Shkodrës, dalin emrat