Partia Demokratike, ka dalë me emra, duke akuzuar qeverinë se ka punësuar motrat dhe kunatat e anëtarëve të kësaj mazhorance.

Deputetja demokrate Izmira Ulqinaku tha sot se shtetin e ka vënë në dorën e bandave të partisë, në dorën e militantëve dhe të paaftëve, si dhe në dorën e motrave dhe kunatave të partisë.

Sipas saj, Fondi i Kujdesit të Detyrueshëm Shëndetësor është modeli i nepotizmit të qeverisë së Edi Ramës, ku ortakëria familjare është në themel të administrimit të miliarda lekëve nga taksat e shqiptarëve.

Ajo tha se Fondi i Kujdesit të Detyrueshëm Shëndetësor është modeli i nepotizmit të qeverisë dhe i dorëzimit të shtetit në duart e motrave dhe kunatave të partisë.

“310 milionë euro është buxheti vjetor i Fondit ku punon motra e Arben Ahmetajt, e emëruar zëvendësdrejtore e përgjithshme pak ditë më parë, kunata e Ogerta Manastirliut, kunata e Taulant Ballës, kunata e Engjëll Agaçit, kunata e Fatmir Xhafës. Me pak fjalë, e gjithë vëmendja është për kunatat! Nga një anë, është Arben Ahmetaj dhe Ogerta Manastirliu që, si anëtarë të Këshillit Drejtues vendosin për Fondin e Sigurimit Shëndetësor, nga ana tjetër janë motrat dhe kunatat e tyre që firmosin për dërgimin e parave në llogaritë e klientëve të qeverisë”, u shpreh Ulqinaku.

Deputetja demokrate shtoi më tej se shqiptarët duhet ta dinë se nga 310 milionë euro buxhet për Fondin, 110 milionë euro janë para që shqiptarët i paguajnë direkt si sigurim shëndetësor dhe pjesa tjetër 200 milionë euro, janë nga taksat tona, që motrat dhe kunatat e ministrave i ndajnë me klientët e pushtetit.

Po ashtu tha se gjatë drejtimit të Fondit Shëndetësor nga motrat dhe kunatat e Arben Ahmetajt, Ogerta Manastirliut, Taulant Ballës, Engjëll Agaçit, Fatmir Xhafës, qeveria paguan në një vit për koncesionet në shëndetësi 24 milionë euro, për rimbursimet 90 milionë euro dhe me pjesën tjetër financojnë spitalet, ku ilaçet mungojnë, të sëmurët nuk mjekohen dhe mjekët largohen.

“Është modeli i motrave dhe kunatave të ministrave në administratë që detyron 79 % të rinisë mendojë largimin nga vendi, sepse të rinjtë e kanë provuar vetë me konkurset fiktive se vëmendja e qeverisë nuk është për ta, por për familjen e kryeministrit, familjet e ministrave dhe pushtetarëve të tjerë”, tha ndër të tjera Ulqinaku.

Ajo e mbylli fjalën duke deklaruar se Partia Demokratike është e gatshme të ndalojë me masa te rrepta ligjore emërimin e familjarëve të ministrave apo drejtuesve të tjerë të lartë në poste që kanë në dorë paratë e shqiptarëve apo pasuritë publike dhe natyrore të vendit. /a.y/noa.al