Deputeti demokrat Gent Strazimiri thotë se ngjarja e shpërthimit të gazit në një çerdhe të Tiranës i ka hequr lustrën e propagandës dhe ka nxjerrë Erion Veliajn e vërtetë, atë që jo të gjithë e njohin sipas tij: “një mashtrues të korruptuar, që nuk kursen as fëmijët për hir të pushtetit”.

Në një dalje për mediat nga selia blu ai tha se Erion Veliaj vazhdon të heshtë për ngjarjen e tmerrshme në çerdhen 14 të Tiranës, ku shpërthimi i fuqishëm, fatmirësisht, ndodhi në një orë kur çerdhet janë të zbrazura.

“Njësoj siç veproi për të fshehur dhe pastaj për të mbuluar krimin e vrasjes së 16-vjeçarit Ardit Gjoklaj tek plehrat e Sharrës, Erion Veliaj ka urdhëruar zhdukjen e çdo gjurme të përgjegjësisë kriminale të Bashkisë së Tiranës për shpërthimin shkatërrues nga një bombol gazi, në çerdhen 14 në Ali Demi. Erion Veliaj është angazhuar personalisht të gënjejë dhe mashtrojë çdo njeri publik që flet për ngjarjen, duke u thënë se shpërthimi ishte në një godinë jashtë çerdhes dhe pa lidhje me të”, u shpreh Strazimiri.

Ai shton se Erion Veliaj urdhëroi vartësit të gënjenin prindërit e alarmuar duke u thënë se çerdhja nuk përdorte gaz.

Sipas tij, pamjet televizive të ekraneve që nuk e censuruan ngjarjen, siç e çensuroi Top Channel, dhe dëshmitë e gazetarëve nga vendngjarja provojnë mashtrimin kriminal të Erion Veliajt, duke thënë se tregojnë se shpërthimi është brenda çerdhes dhe se prindërit dëshmonin për erën e fortë të gazit.

Ai shtoi ndër të tjera se një kryebashkiak i përgjegjshëm, që nuk i përdor fëmijët për fasadë dhe propagandë, do të kishte sqaruar publikisht rrethanat që, veç për hatër të Zotit nuk sollën një tragjedi, si dhe do të kishte marrë masa urgjente për të verifikuar gjendjen e të gjitha çerdheve dhe kopshteve në Tiranë.

“Realiteti është se Tirana drejtohet nga një mashtrues dhe hajdut që bën gjithçka për të fshehur krimet e tij. Nëse Prokuroria do të ishte në krye të detyrës dhe jo nën kontrollin e qeverisë, Erjon Veliaj do të ishte në burg si përgjegjës për manipulimin dhe fshehjen e provave, ose e thënë me terma teknike ‘për pengim të drejtësisë’, të së vërtetës! Çështja është se “drejtësia” nuk po e kërkon të vërtetën”, deklaroi në mbyllje Strazimiri. ​/a.y/noa.al

Shpërthen bombola e gazit në një çerdhe në Tiranë, shmanget tragjedia