Dy vëllezër janë vënë në prangat e policisë së Fierit të shpallur në kërkim, për rrëmbim personi.
Të arrestuarit janë Lani Boraj, 37 vjeç dhe Olen Boraj, 31 vjeç, banues në Ksamil, Sarandë.
Ndalimi i tyre u bë gjatë ditës së djeshme, e martë, pasi Gjykata e Fierit më 24 maj ka dhënë masën e sigurisë “Arrest në burg”.
Ata akuzohen për veprat penale “Heqja e paligjshme e lirisë”, “Prodhimi dhe mbajtje pa leje e armëve dhe municionit luftarak” dhe "Vetëgjyqësia”.
Noa.al mëson se vëllezërit Boraj kanë marrë peng një burrë nga Fieri, duke u kërkuar paratë që ish-gruaja e këtij të fundit iu kishte marrë borxh.
Më konkretisht në korrik të vitit 2017, në bashkëpunim me njeri tjetrin, vëllezërit Boraj në fshatin Hekal, Mallakastër, kanë marrë forcërisht dhe i kanë hequr lirinë për disa orë shtetasit S.B., 46 vjeç, banues në Fier.
Ishte denoncimi i të dëmtuarit ai që vuri në lëvizje policinë, duke nisur hetimet, ndërkohë që të dyshuarit u kapën pas afro një viti. /a.y/noa.al