Aksionit për gjelbërimin e qytetit të Tiranës, i është bashkuar këngëtari shumë i pëlqyer nga të rinjtë, Noizy, i cili mbolli disa pemë së bashku me kryebashkiakun Erion Veliaj.

Ata i bënë thirrje të gjithë qytetarëve që ende nuk i janë bashkuar nismës, që të shfrytëzojnë 10 ditët e fundit për të mbjellë pemë.

“Sot është një ditë fantastike për të mbjellë pemë, për të qenë këtu me shokë e miq, që i çmojmë jashtë mase. E vlerësoj jashtë mase rolin e bizneseve dhe kompanive që kanë zgjedhur që përgjegjshmërinë e tyre sociale, ta përkthejnë në gjelbërim për qytetin”, u shpreh Veliaj.

Ai falenderoi në mënyrë të veçantë Noizy-n, i cili u bë pjesë e aksionit të gjelbërimit, duke sjellë shembullin e mirë për të gjithë ata të rinj që duan të kontribuojnë për një qytet më të mirë.

“Noizy, na u bashkua me punë vullnetare, sepse edhe ai beson që një artist i mirë është edhe qytetar i mirë. Noizy jo vetëm është një artist i shkëlqyer, por edhe një çun i mirë. Për të gjithë të rinjtë që mendojnë se njeriu ka vetëm një dimension, besoj se Noizy është prova e gjallë që një njeri i mirë dhe i aftë mund të bëjë shumë gjëra, mund të jetë një shembull në art, për rininë, një shembull për qytetin, edhe duke bërë punë vullnetare. Për këdo që thotë nuk më del koha, Noizy është prova se koha del për të gjitha, në qoftë e ndan mendjen për të bërë mirë. Një frymëzim i tillë i duhet sot të rinjve shqiptarë”, u shpreh Veliaj.

Këngëtari Noizy i bëri apel të rinjve që të bëhen pjesë e kësaj nisme dhe të mbjellin një pemë për ta bërë qytetin edhe më të mirë.

“Nëse unë kam frymëzuar shumë të rinj, edhe ata në moshë disi më të re, do t’ju lutesha të gjithëve që të mbjellin një fidan, qoftë edhe në oborrin tuaj, nuk do të ishte keq, madje diçka shumë e bukur për një qytet të ngarkuar si Tirana. Ndaj, pse jo! Nëse unë jam frymëzim për ju, atëherë ju bëj thirrje të gjithë të rinjve që të kontribuoni sadopak për këtë ndryshim që Shqipëria ka nevojë”, u shpreh Noizy.

Ndërkaq, Veliaj tha se puna që po bëhet sot me gjelbërimin e Tiranës do të jetë paja më e mirë për brezat që vijnë pas.

Ai bëri të ditur se deri më tani procesi i mbjelljeve ka ecur shumë mirë dhe se deri në 21 Mars do të arrihet rekordi prej 100 mijë pemë të mbjella. /a.y/noa.al