Policia e Memaliajt ka sekuestruar një arsenal armësh dhe një sasi prej 5 kilogram kanabis sativa. Ndërsa janë shpallur në kërkim dy persona, identiteti i të cilëve nuk bëhet publik nga policia për arsye hetimi.
Burime policore sqarojnë se dy persona po transportonin në një përrua, armë e drogë me qëllim fshehjen e tyre. Blutë kanë ushtruar kontroll të imtësishëm në vendin e quajtur "Përroi i Madh", në fshatin Zhapokikë, Bashkia Memaliaj.
Si rezultat i kontrollit shërbimet e Policisë kanë gjetur të fshehura në një zonë me shkurre 4 armë zjarri, përkatësish: tre armë zjarri model 54, një armë zjarri automatike model 56 si dhe dy krehëra me fishekë.
Gjithashtu, pranë tyre është gjetur dhe një qese e zezë, brenda të cilës kishte lëndë të dyshuar narkotike kanabis sativa me peshë totale, 5 kg”.
Nga shërbimet e policisë po punohet për zbardhjen e plotë të kësaj veprimtarie kriminale si dhe për kapjen e autorëve.
Materialet i kaluan Prokurorisë Pranë Gjykatës së Shkallës së Parë Gjirokastër për hetime të mëtejshme për veprën penale “Prodhimi dhe shitja e lëndëve narkotike” dhe “Mbajtja pa leje e armëve luftarake dhe municionit”./b.l/noa.al/