Ndërpritet për të katërtën herë seanca parlamentare e ditës së sotme, pasi kreu i opozitës Lulzim Basha, bashkë me deputetët e Partisë Demokratike, nuk lirojnë foltoren.
Në rinisjen e punimeve në orën 13.00, për shkak se situata nuk kishte asnjë ndryshim, kryeparlamentari Gramoz Ruçi e shtyu seancën për në orën 18.00.
Më herët Lulzim Basha u përjashtua nga seanca parlamentare, teksa opozita kërkonte diskutim për komisionin e reformës zgjedhore.
Edhe pas kësaj mase Lulzim Basha dhe deputetët e Partisë Demokratike nuk u larguan nga foltorja, çka bëri që kryeparlamentari Gramoz Ruçi të ndërpriste seancën.
Duke parë pamundësinë e vijimit normal të seancës, ai lexoi rregulloren e Kuvendit, duke thënë se në rast se rrëmuja vazhdon pezullohet seanca.
Ai tha se masa e parë që parashikon ndërprerje të seancës u zbatua, masa e dytë bëri me dije, është pezullimi i seancës për një periudhë kohe të caktuar.
Në këtë linjë tha se “Në rast se situata vazhdon seanca shtyhet për ditën e nesërme”.
Kryetari i Kuvendit Gramoz Ruçi duke lexuar pjesë të rregullores, përjashtoi me një ditë nga seanca, kreun e opozitës.
Ai tha se përjashtimi shoqërohet edhe me heqjen e një dite nga paga e deputetit.
Ndërsa Ruçi i bëri thirrje që të largohej nga foltorja duke i thënë se nuk do donte që masën e parë ndëshkuese ta merrte ndaj liderit të opozitës, Basha vijoi të qëndronte, çka bëri që kryeparlamentari të marrë masën drastike.
Gjithçka ndodhi pasi Ruçi u përfshi në debat me kreun e opozitës Lulzim Basha, gjatë kohës që diskutohej ngritja e komisionit të reformës zgjedhore.
Kjo pasi opozita po kërkon debate për këtë komision dhe kërkon që ky debat të zhvillohet pasditen e sotme.
Kurse grupi parlamentar i Partisë Socialiste dhe ai i Lëvizjes Socialiste për Integrim kërkojnë që debati të zhvillohet në një seancë tjetër.
Kryedemokrati Lulzim Basha i kërkoi kryeparlamentarit që të mbledhë Konferencën e Kryetarëve.
Ai akuzoi se kërkohet që t’i mbyllet goja opozitës, duke mos u larguar nga foltorja, ku kanë paralajmëruar se do të qëndrojnë deri në orën 18.00./a.y/noa.al