Tiranë, 1 shkurt 2017, NOA.al- Ministri i ri i Drejtësisë, Petrit Vasili komenton shkarkimin e paraardhësit të tij Ylli Manjani.

Ai tha se mes Kryeministrit Edi Rama dhe ish- ministrit Manjani, prej kohësh ka pasur një ngërç në komunikim dhe marrëdhënie.

“Ka patur një marrëdhënie të vështirë mes Ramës dhe Manjanit, dhe natyrisht prevalon vullneti i Kryeministrit. LSI ka një mënyrë sjelljeje të qartë, qëndrime politike të qarta të mbajtura nga kryetari, nga unë, dhe nga të tjerë anëtarë. Unë nuk qëndroj në këtë çështje, qëndrimet e LSI-së janë të qarta. Qëndrimet tona janë zyrtare të qarta dhe të kthjellëta, shqetësimet e Kokës (ministrit Lefter Koka) ishin lokale dhe për një çështje të caktuar, kjo çështje mbyllet këtu, jo më larg nga sot patëm një qëndrim të qartë”, u shpreh Vasili.

Në vijim i ftuar në emisionin “Opinion” ai foli për çështjen e kanabizimit të vendit dhe për akuzat ndaj ministrit të Brendshëm Saimir Tahiri.

“Policia shqiptare është një trupë e ndershme punonjësish, nuk ka dyshime, por ka oficerë dhe drejtues të caktuar, individë të cilët janë të korruptuar e të lidhur me krimin që kanë mundësuar shtimin dhe jo parandalimin e kultivimit të kanabisit”, tha Vasili.

Gjithashtu ai shtoi se është një problem që duhet t’i dilet përballë, pa io ikur.

Në vijim ai mohoi që t’u ketë thënë deputetëve të LSI, që të kenë kujdes mos policia ju u fut drogë në makinë.

I pyetur nëse LSI do dalë e vetme në zgjedhje, ai tha se LSI i ka dhënë përgjigje kësaj pyetje.

“LSI ka marrë pjesë në zgjedhje vetëm njëherë të vetme si pjesë e një koalicioni, në të gjitha rastet e tjera, ajo ka konkurruar e vetme”, tha ai.

Vasili shpjegoi edhe deklaratën e Luan Ramës bërë dy ditë më parë kur tha se, kishte dy zgjedhje ose shkarkimin e Manjanit ose shkarkimin e Ramës.

Vasili u shpreh se deklarata ishte se pas konfliktit mes Manjanit dhe Ramës prevalon propozimi i Kryeministrit si drejtues i qeverisë.

I pyetur për Kelment Balilin dhe lidhjet e tij me LSI, Vasili u shpreh se, “Personalisht nuk e kam njohur kurrë këtë njeri. Sa i takon komenteve, përgjigja është qëndrimi i LSI, kërkesa e Metës dhe deklaratat e Manjanit. Ka qenë zyrtar i propozuar nga ne, pa pasur asnjë rekord kriminal”./a.y/noa.al

Intervista e plotë

Z. Manjani është ende ministër në detyrë. A ka pasur sot apo dje pasdite LSI të njëjtin shqetësim që pati PS lidhur me akuzat e Manjanit?

Nuk kemi pasur asnjë shqetësim sepse gjithçka kishim për të artikuluar për këtë çështje besojë se u shteruan në të dy daljet publike të një pas njëshme, edhe të Sekretares të Marrëdhënieve me Publikun, por edhe të Nënkryetarit Luan Rama.

Ajo që tha z. Luan Rama duket befasuese, thotë zgjodhëm të largonim Manjanin që të mos hiqnim kryeministrin. Çdo me thënë kjo, duket sikur ju keni pasur në dorë të hiqnit edhe Kryeministrin ndërkohë që më duket është e kundërta…

Vërtet është për mua të perifrazojë Luan Ramën i cili shumë i qartë në të folurin e tij, edhe për shkak të vokacionit të profesionit të tij të mëparshëm si gazetar, kështu që ky qëndrim politik ka qenë edhe i kthjellët, edhe i qartë dhe ka dhënë të kuptohet këtë gjë me pak fjalë.

Meqë ju ma kërkoni një shpjegim të ri, ka pasur një marrëdhënie besojë të një funksionimi të vështirë midis Kryeministrit dhe Ministrit Manjani, dhe natyrshëm prevalon vullneti i kryeministrit i cili është drejtuesi i qeverisë, është njëkohësisht edhe vlerësuesi i komunikimit të përditshëm edhe institucional dhe jo vetëm dhe personal.

Dhe sigurisht në këtë rast, gjithë ajo që Luan Rama ka shpjeguar është pikërisht që zgjedhja ishte motivuar pikërisht nga ky sistem i të menduarit i cili i bën shërbim një bashkëpunimi më fleksibël dhe më frytdhënës se sa një konfliktualitet të përditshëm i cili sigurisht vështirëson punën.

Ky konfliktualitet i përditshëm që e quani ju, është një konfliktualitet që ka ardhur nga Ylli Manjani personalisht apo ka qenë dhe qëndrim i LSI?

Lëvizja Socialiste për Integrim ka një mënyrë sjellje shumë të qartë, ka qëndrime politike të cilat nuk i lë të dyzuara. Qëndrime politike të cilat janë mbajtur nga kryetari i saj. Janë mbajtur nga unë si kryetar i Grupit Parlamentar apo njerëz të tjetër të LSI-së të lidershipit të autorizuar…

Ju po thoni që akuzat që ka bërë z. Manjani i ka pasur personale dhe nuk ka lidhje me LSI-në?

Unë nuk qëndroj në këtë çështje për një arsye shumë të thjeshtë, qëndrimet politike të LSI-së janë qëndrime zyrtare shumë të qarta që janë edhe në sytë tuaja edhe në rekordet tuaja. Thënë e gjithë kjo: nuk ka pasur e nuk do të ketë asnjë dyzim në qëndrimet tona, të gjitha qëndrimet tona politike do të jenë transparente dhe në sytë tuaj do të jenë të lehta për t’u komentuar nga ju.

Qëndrimet e z. Manjani si ministër i Lëvizjes Socialiste për Integrim, kanë qenë qëndrime të LSI-së apo qëndrime të tij personale?

Në qoftë se më ndoqët, e thashë që qëndrimet tona janë qëndrime zyrtare, të qarta e të kthjellëta. Për sa u takon qëndrimeve të cilat janë qëndrime individuale, që vijnë nga shqetësime të dalluara, shqetësimet e z. Koka ishin shqetësime të lokalizuara e kishin të bënin me një zonë të caktuar, me një problematikë të caktuar. Pra, janë të tilla. Mendoj që kjo çështje mbyllet këtu pasi qëndrimet politike janë shumë të kthjellëta e jo më larg se sa sot ne patëm një qëndrim të gjatë, të qartë, për të gjitha temat e ditës nga vetë kryetari i LSI-së.

Unë kam disa pyetje që nuk munda t’ia bëja kryetarit të LSI-së e që dua t’jua bëj ju z. Vasili, që do të thotë: A po kanalizohet vendi nën qeverisjen e Edi Ramës dhe të koalicionit PS-LSI?

Ka një shqetësim për kanabizimin e vendit. Një shqetësim, i cili nuk është më i lokalizuar, por ka marrë edhe një dimension tjetër, pasi ju keni edhe konstatimet tuaja, por, konstatime edhe mediatike të mediave autoritare botërore. Ato e kanë prurë problemin…

Mediat botërore kanë thënë që Shqipëria është vendi i parë eksportues në Evropë për kanabisin…

Kam sjellë shqetësimin, nuk po merrem me shifrat, duke pasur rezerva sepse shifrat gjithmonë kanë rezerva brenda, por duke marrë shqetësimin, pra sensibilitetin, është një problem me të cilin duhet ta shohim ballas. Nuk mund t’i ikim problemit absolutisht dhe strategjia e parandalimit sot bëhet më efikase se kurrë pasi strategjia, që nuk është strategji, por është dështim, që të shndërrohesh në korrës të kanabisit në vend të parandalimit, besoj që e rëndon problemin dhe nuk e zgjidh atë. Ndaj në këtë pikëpamje besoj që ka shumë për të bërë.

Cila është përgjegjësia juaj si LSI-së që vendi po kanalizohet dhe që qeveria çon policët për të korrur kanabisin?

Ne kemi detyrën politike që të shohim problemin në sy, është shumë keq të mos ta shohësh problemin në sy dhe kjo do të ishte gabim dhe e pafalshme. Ta shohim, të sensibilizojmë maksimalisht dhe të nxisim, inkurajojmë maksimalisht të gjitha ato institucione shtetërore që kanë detyrën në vijë të parë ta luftojnë atë.

A është ashtu siç thotë z. Koka “policia shqiptare e drejtuar nga kjo qeveri e lidhur me bandat dhe me kultivuesit dhe trafikantët e kanabisit”?

Kam një opinion të qartë timin për këtë çështje. Policia shqiptare në tërësinë e saj është një trupë e ndershme punonjësish dhe në këtë pikë nuk duhet të ketë asnjë dilemë, porse ka fenomene dhe drejtues të caktuar të cilët duhet të jenë nën vëzhgim të fortë, individë të korruptuar dhe ët lidhur me krimin kanë mundësuar që ky kultivim të shtohet dhe parandalimi të mos ndodhë. Nuk mund të ndodhë shtimi dhe kultivimi pa pasur dhe problematikë të personave të caktuar në polici të cilët mbyllin sytë jo nga halli por nga shkalla e korrupsionit të tyre.

Që do të thotë se kanë mbështetje politike apo janë individë të korruptuar siç ndodh në shumë vende të tjera? Është kanabisi nën bekimin e figurave politike të kësaj qeverie…?

Unë për sa informacion kam, që është i ngjashëm me informacionin e bollshëm që edhe ju si gazetarë keni së bashku, më rezulton që ka problematikë. E detajuar, ku shkojnë përgjegjësitë dhe në ç’nivele janë agjencia të tjera të cilat duhet ta kryejnë këtë punë dhe unë nuk e ndryshoj kurrë rolin tim, as të bëhem hetues apo prokuror, sepse nuk e bëjë dot këtë detyrë. Si politikan kam detyrë të them që ka një problematikë me të cilën duhet të përballemi dhe nuk mund t’i fshihemi. Për këtë jam shumë i qartë dhe i prerë.

Por nëse ka një problematikë ju jeni në qeveri dhe mbani përgjegjësi për këtë si anëtarë të qeverisë ose duhet të vini gishtin mbi lidhjet reale?

Po ua them edhe një herë tjetër, detyra jonë është të mos i fshihemi dhe ta sensibilizojmë problemin. Secili duhet të kryejë punën e tij dhe sigurisht, duke folur për përgjegjësitë, do t’ia kërkoja dhe sensibilizoj e inkurajoj, aq sa më takon si politikan,atyre që merren pikërisht në vijën e parë.

Kujt ia kërkoni këtë përgjegjësi?

Sigurisht, të gjitha organeve të shërbimeve informative përkatëse, drejtoria e përgjithshme e policisë, po ashtu Ministria e Brendshme, të gjitha institucionet që kanë detyra të qarta për tu marrë me këtë gjë. Pra, ata që e kanë këtë detyrë me ligj duhet të veprojnë me ritme të tjera dhe me një shkallë lufte më të fortë ndaj këtij korrupsioni që e pjell dhe e mban gjallë fenomenin.

A i keni thënë ju deputetëve të LSI-së që të kenë kujdes makinat se policia mund t’ju fusë drogë?

Nuk komentoj asnjë lajm mediatik. Unë çdo qëndrim timin e mbaj publikisht.

Është duke kërkuar LSI ‘kokën’ e Saimir Tahirit? Keni kërkuar shkëmbimin e z. Tahiri me z. Manjani?

Absolutisht që jo! Nuk është gjuha e komunikimit të LSI-së kjo as në tërësi dhe as në komunikimin më të ngushtë politik logjika e shkëmbimit të trofeve të njëri-tjetrit. Kjo është një logjikë e huaj për ne. Nuk ka për të qenë asnjëherë mënyra e sjelljes sonë në politikë. Nuk do ta shikoni kurrë një lloj komunikimi të tillë. Diskutimi ynë është parimor.

Pse duhet sikur strukturat mediatike të LSI-së janë të përqendruara të z. Tahiri? Çfarë problemi ka LSI me Saimir Tahirin?

Nuk jemi fokusuar në asnjë rast tek ministri Tahiri. Jemi fokusuar në të gjitha rastet në problematikat që konstatojmë. Pra, do të thotë që në të gjitha rastet kur kemi konstatuar mos ecje të reformave, ku kemi vërejtur ngecje në vend të tyre, apo ecjen në një drejtim, i cili nuk është konform atyre që presin qytetarët, ne kemi qenë kritikë. Pra, nuk jemi fokusuar tek ministri Tahiri apo tek ndonjë ministër tjetër. Pra, do të thotë që problematikave që kemi konstatuar që duhet t’i qasemi, t’i përballemi, i kemi ngritur. Pra, nuk kemi pasur një fokus, por kemi pasur një problem.

Z. Vasili, cili është vlerësimi që ju mund të m bëni për ministrin Tahiri?

Unë nuk kam të drejtë të bëj vlerësime, për një arsye shumë të thjeshtë. Së pari kam një pamundësi, etike dhe institucionale. Etike është pasi unë para pak orësh jam dekretuar si ministër dhe etika nuk ma lejon të bëj vlerësimi për një koleg tjetër, pasi vlerësimet për të gjithë, kushtetueshmërisht, i bën Kryeministri i vendit dhe unë nuk mund të marr atribute, të cilat nuk janë të miat. Përsa i takon problematikave që ne patëm mundësi t’i diskutonim dhe më lart, janë problematika, të cilat kërkojmë përballje dhe përgjigje. Për këtë nuk ka asnjë diskutim.

Ndërkohë, ju jeni mjek. Keni qenë ish-ministër i Shëndetësisë. E njihni mjaft mirë këtë fushë. A ka dështuar kjo qeveri dhe kjo qeverisje me shëndetësinë apo jo?

Nuk e kam pasur karakteristikë kurrë që të flas në ka dështuar apo ka triumfuar. Jua them këtë gjë si një njeri që e ka provuar këtë gjë për disa vite. Reformat në shëndetësi janë të gjata, të vështira, tejkalojnë mandatet. Mendoj që disa objektiva mund të ishin riformuluar më mirë dhe objektivi i shëndetësisë falas mund të kishte qenë pak më modest duke iu referuar kohës së shkurtër të mandatit dhe kohës shumë të gjatë që kjo reformë do kërkonte. I kam pasur këto rezerva duke mos mohuar arritje të caktuara në fushën e shëndetësisë. Kam sugjeruar një riformulim më racional të programit dhe më të përmbajtur në raport edhe me zhvillimin e vendit sepse e lidhur me financime të caktuara që shëndetësia nuk i ka dhe nuk mund t’i ketë për vite të caktuara, ishin reforma të cilat ishin relativisht të pamundura të zgjidheshin në kaq pak kohë.

Kjo qeverisje po shkon mirë apo ka qenë një dështim?

Qeverisja e kësaj mazhorance është përballur me problematika të mëdha. Ne duhet të ndajmë mirë përballjen me këto problematika dhe me problematikat që mund të mos marrin përgjigje. Disa çështje madhore janë këtu në tavolinë, qoftë sa i takon reformës administrative-territoriale, reformës në drejtësi, atë në energjetikë, dhe plus përballja me kolapsin financiar ishin çështje me të cilat duhet të përballeshim. A kishim reforma me të cilat duhet të ishin diskutuar edhe më gjatë me grupet e interesit, këtu ka vend për diskutime. Reforma në arsim mund të ishte diskutuar më gjatë dhe mund të ishin shmangur disa keqkuptime që krijuan disa pakënaqësi, disa raste zemëratë. Por, përballja me to ka qenë e vështirë.

Çfarë presioni ju bëri z. Rama për shkarkimin e Manjanit ?

Asnjë lloj presioni. Problemi ka qenë i thjeshtë; kryeministri ka paraqitur një shqetësim që edhe herë të tjera e ka ngritur në forma të ndryshme, për një marrëdhënie të vështirë që funksiononte me probleme, të cilat ishin probleme jo vetëm institucionale por edhe vështirësi të karakterit ndërpersonal. Ne e kemi bashkëndarë me kryeministrin Rama, edhe pa e konsumuar me Kryetarin Meta, si një keqkuptim i vazhdueshëm që nuk gjente rrugën e pajtimit.

“Nëse Rama ka sot 71 mandate ne largohemi nga qeverisja”, thotë z. Meta. Ndërkohë që sot në mbledhjen e kryesisë, sipas shtypit, Rama ka thënë që i ka 71 vota. Duket sikur Rama ju ka sfiduar sërish sot. Ju keni thënë në i ka 71 vota ne largohemi, Rama ka thënë që i ka 71 votat. A është kjo një sfidë ndaj jush?

Së pari, për të qenë plotësisht korrekt, unë komente mbi burimet mediatike nuk bëj. Kjo është një çështje e zgjidhur edhe në planin etik, edhe në planin politik. Edhe në rast se do të bënte një prononcim publik, nuk besoj se do të mungonte përgjigja e menjëhershme dhe e qartë, sikurse ishte edhe prononcimi shumë i qartë i Ilir Metës sot në drekë.

Z. Vasili, thonë se LSI-ja flet si opozitë dhe voton si qeveri. Në zgjedhjet e ardhshme do të dilni vetëm apo sërish me Partinë Socialiste?

Për këtë pjesën e parë të pyetjes që bëre, kam dëgjuar edhe shumë njerëz, në kuptimin malinj, dritëshkurtër. Kjo pasi modeli i bashkëqeverisjes me oportunizëm pafund është e vetmja gjë që i lumturon, kurse një bashkëqeverisje që ndan problematikat dhe i ndan ato i çon patjetër në llogoren “pro dhe kundër”, që është një model arsyetimi politik, por gjynah i madh që bie edhe analiza mediatike në këtë nivel që ndan llogore.

Z. Vasili ju mund të vendosni veton, ju mund të propozoni ligjet, ju mund të impononi qëndrimet tuaja…

Në rast se ju e mendoni qeverisjen një makineri që konsumon të gjitha gjërat brenda, kjo do të ishte një ditë e zezë edhe për qeverisjen, por edhe për mediat. Do të ishte fundi! Edhe ne nuk do të kishim fituar asgjë në vitin ‘90. E vetmja gjë që kemi fituar pas viteve ‘90, që të kemi mundësi që në të gjitha nivelet të kemi mundësi të paraqesim edhe shqetësime.

Dua t’ju bëj edhe një pyetje: Çfarë kuptimi do të kishin shumë nisma parlamentare që merren nga deputetë të caktuar, qoftë edhe të mazhorancës, për ndryshim ligjesh të caktuara të cilat qeveria nuk i ka bërë. Kjo do të ishte mungesë koherence ndaj mazhorancës?! Janë nisma, apo ide, apo sugjerime të cilat përmirësojnë qeverisjen. Një nga gjërat që u përdor vazhdimisht ishte “të gjithë ata në rresht!”. Rreshti ka një konotacion tepër negativ dhe të prapambetur, kurse interaktiviteti dhe shkëmbimi do të thotë që…

…Për çfarë shkëmbimi flasim z. Vasili kur thoni që kanabizimi i vendit është problem, kur thoni që reforma në shëndetësi është problem, kur thoni që reforma në arsim është problem, kur thoni që policia është e lidhur me bandat, kur thoni që kryebashkiaku i Durrësit po bën “rrush e kumbulla” paratë e shqiptarëve, atëherë për çfarë qeverisje flasim? Këto nuk guxon t’i thotë as opozita. Ndërkohë vazhdoni qëndroni në këtë qeveri…

Në studion tënde ka shumë analistë të nderuar, koleg të tutë edhe pena të mira dhe vazhdimisht ka ngritur problemin pse LSI-ja nuk i ngre këto probleme. Por në momentin që ne i ngremë këto probleme thonë që LSI-ja po bën opozitë. Në rast se unë, ose deputet, ose si kryetar i grupit parlamentar do të ngre një shqetësim, kjo nuk është oponencë.

Po flasim për faktin që ju sot kritikoni reformën në arsim dhe ju e keni votuar reformën në arsim. Keni kritikuar reformën në drejtësi dhe keni votuar reformën në drejtësi…

Po të hapim arshivën tuaj, ju do të gjeni një gjë shumë të thjeshtë. Unë kam folur për reformën në arsim në emër të grupit parlamentar dhe kam thënë se sfida e vështirë e vërtet e reformës në arsim fillon në zbatimin e saj dhe në hartimin e aktit nënligjor, pasi kjo do të jetë një nga pjesët më të vështira, më të thepisura të reformës. Me këtë hamendje dhe mëdyshje që unë kisha, jo në kuptimin negativ, por për korpusin e gjerë, praktika na dha të drejtë. Pra e kam ngritur atë dyshim dhe sot e rimarrim në mënyrë që kjo të përmirësohet, jo të rrëzohet.

Z. Vasili ku shkojnë sot parat që hyjnë nga kanabis?

Janë agjencitë përkatëse që duhet të bëjnë investigimin, hetimin…

A jeni të shqetësuar ku shkojnë këto para?

Jemi të shqetësuar.

A mund të shkojnë këto para për të blerë zgjedhje, për të blerë poste publike dhe politike?

Të gjitha këto para do të shkojnë vetëm për të shtuar pisllëkun shoqëror dhe politik, për asgjë tjetër.

Çfarë masash merrni ju në këtë drejtim. Ju pas 28 orësh mund të jeni Ministër i Drejtësisë. A keni një nisëm ose ndonjë ide?

Asnjë nisëm nuk do të thosha sot në mënyrë absolute pa parë qartësisht cilat janë hapësirat institucionale dhe me të gjitha veprimet e mundshme që do të bëheshin, do t’i shoqëroja të gjitha duke i paraqitur si nisma institucionale dhe asnjëherë si deklarata publike

Z. Vasili a keni pasur ju njohje personale me Klement Balili dhe a është ky një njeri i LSI, i suportuar nga LSI?

Personalisht as se kam njohur kurrë këtë njeri dhe për sa i takon këtyre komenteve besoj që përgjigja më e mirë për këto komente është një dhe vetëm një, qëndrimi i LSI në të gjitha nivelet e saj, që nga kryetari i cili ka ndërmarrë edhe një nismë e cila është edhe unikale dhe të gjitha qëndrimet, edhe në qëndrimet e Ministrit Manjani në lidhje me këtë çështje kanë qenë kaq të kristalta sa kjo ka qenë përgjigja më e mirë për të tërë këto hamendje intrigrante i cili nuk do të reshtin.

Por ka qenë një zyrtar i emëruar nga LSI në postin e tij?

Ky ka qenë një zyrtar i propozuar nga ne, pa pasur asnjë informacion lidhur me këtë njeri sepse ky ka qenë një njeri i lirë mesa kujtojë..

Por mbasi kishte dalë një herë në gjyq dhe kishte kryer një dënim për trafik narkotikësh në vitet 2006-2007…

Nuk e di këtë gjë. Ky ka qenë një njeri i lirë dhe praktikisht në momentin pa dalë as urdhër arrestet, pro mesa ka dalë informacioni, ky njeri është shkarkuar nga detyra dhe ne kemi pasur një distancim të plotë dhe nuk ka qenë pjesë të strukturave të LSI.

A ka të afërm të tij që janë pjesë të LSI të suportuar prej tij?

Çdo njeri në LSI, që nga Petrit Vasili, deri poshtë, në qoftë se kanë përfshirje, inkriminime të çdo lloj, nuk janë më dhe nuk kanë asnjë lidhje me LSI. Ky raport politik, sidoqoftë, përfundon në çastin që ndodh një inkriminim i tillë.

A keni frikë se arrestimi i Balilit mund të nxjerri emra të rëndësishëm të LSI?

Mezi presim që Balili të ndalohet dhe pikërisht vënia në lëvizje e Këshillit të Sigurimit Kombëtar si nisëm e pa ndodhur kurrë ka vetëm një qëllim: nxitjen dhe inkurajimin e institucioneve shtetërore që ta kryejmë sa më parë dhe unë do të perifrazoj vetëm një fjalë të deklaratës së Ilir Metës, i cili tha qartë se Balili duhet të ishte arrestuar dje.

Z. Vasili, ju keni folur për deputetët e inkriminuar pasi opozita e ngriti me të madhe këtë çështje, por në radhët tuaja ka rezultuar një deputet i cili humbi mandatin për këtë çështje. A mbani përgjegjësi për këtë?

Jo nuk mbajmë përgjegjësi. Për një arsye shumë të thjeshtë, sepse kur ky deputet ka fituar mandatin ne nuk kemi pasur asnjë informacion sikurse nuk ka pasur për deputetë të tjerë të Kuvendit të Shqipërisë. Dhe në momentin që kjo çështje është konstatuar ligji ka vepruar.

A do të veprojë ashpër ligji në zgjedhjet e ardhshme për përfshirjen e personave me precedentë kriminalë në parlament por edhe në strukturat e tjera shtetërore?

Do të ishte jetike për të ardhmen e zgjedhjeve. E para për të mos ricikluar problematika të këtij Parlamenti. Dekriminalizimi është një proces pastrues por edhe na ka errësuar në sytë e opinionit ndërkombëtar si një problematikë mjaft e rëndë, por që e ka shëndoshur politikën dhe shoqërinë shqiptare. Unë bashkëndaj atë që Ilir Meta sot tha, që një nga tre prioritetet madhore përveç reformës zgjedhore dhe asaj në drejtësi është dhe dekriminalizimi, ende në tavolinë për t’u zbatuar plotësisht.

Z. Vasili, më shumë se sa thjesht zbatimi i ligjit është vullneti i liderëve politikë dhe i politikanëve të rëndësishëm për të mos përfshirë banditë kriminelë, hajdutë, trafikantë në listat e deputetëve apo në administratë. LSI-ja çfarë qëndrimi do të mbajë në këtë drejtim?

Qëllimi do të jetë i prerë, do të bëjmë të gjitha verifikimet deri në një për pastërtinë e figurave që do të kandidojnë, duke bërë që ashtu sikurse rezultoi edhe verifikimi i një mase të madhe njerëzish siç ishin dhjetëra apo qindra të zgjedhur në këshillat bashkiakë në Shqipëri, të cilët rezultuan të pastër, do të bëjmë të pamundurën me ët gjitha mundësitë ligjore që lista jonë të jetë 100 % e pastër pa asnjë lloj problemi. Vullneti është shumë i fortë dhe sikur të bëhet fjalë për kandidatë superfitues ne jemi gati të sakrifikojmë vota, mjafton që kontingjenti që do të kandidojë nga LSI të jetë i pastër.

Ka një qëndrim të vazhdueshëm të Partisë Socialiste, e cila deklaron që struktura më e kalbur e kësaj qeverisjeje është LSI-ja dhe personat e punësuar prej saj, që akuzohen për korrupsion dhe abuzime…

Absolutisht nuk bëhem pjesë e komentit sepse nuk ka një koment publik nga PS-ja të kësaj forme siç thoni ju. Unë për fat të keq jam një politikan i një standardi jo të mirë në politikën shqiptare, pasi nuk punoj me thashetheme e as me intriga. Punoj me tavolinën dhe me qëndrim ballor. Në momentin që dikush nga PS-ja do ta thoshte publikisht dhe do të jepte fakte për këtë gjë do të merrte përgjigje që do ta mbante mend gjatë. Ka pasur mjaft funksionarë nga mazhoranca të cilët kanë pasur përkatësi edhe nga PS-ja dhe ndonjë nga LSI-ja të cilët në çast kanë marrë dënimin e merituar dhe sa i takon LSI-së qëndrimi ka qenë i prerë i qartë dhe i fortë. Duke filluar nga anëtari më i thjeshtë, deri te drejtuesi më i lartë.

A është korrupsioni problemi më i madh i kësaj qeverisjeje?

Nuk është çliruar Shqipëria nga korrupsioni dhe në momentin që Shqipëria nuk e lufton korrupsionin fort dhe nuk bindet që shoqëria nuk është shëndoshur nga korrupsioni, besoj që jeton në një ambient jorealist. Korrupsioni vazhdon të mbetet një sfidë madhore për t’u luftuar deri në fund.

Akuza më e rëndë e z. Manjani ishte që qeveria merr vendime pa u mbledhur. Më shumë se kaq nuk mund ta akuzosh një qeveri.

As nuk e njoh rastin në fjalë dhe as nuk mund ta komentoj. Sepse pa e njohur mund të bëja gjykim të gabuar. Janë në rekordet e qeverisë vendimet që janë marrë.

Ju do të jeni ministër i Drejtësisë, duhet t’ju shqetësoj ky rast apo jo?

Duhen parë rastet një nga një. Ka pasur raste kur qeveritë kanë funksionuar me vendime qarkulluese, është e një forme tjetër. Pra, ka dhe forma të tjera.

Një tjetër akuzë, e cila ishte shumë e fortë është kryeministrit i është kërkuar shkarkimi i ministrit të Brendshëm. A keni dijeni?

Nuk kam informacion.

A duhet shkarkuar z. Tahiri për problemin e kanabisit?

Ai e analizon vetë dhe ka përgjegjësinë për ta analizuar dhe e gjykon vetë.

A keni pasur dyshime ju si LSI që drejtues tuajt dhe kreu, z. Meta janë përgjuar nga policia?

Nuk dua të merrem me këtë çështje. Një gjë di të them që nëse ka ndodhur është një veprimtari krejtësisht e paligjshme dhe një veprimtari e ligë, e cila kurdo që të nxirrte kokën do të kishte pasoja të rënda për ata që e ndërmarrin.

Po për akuzën e z. Manjani që kryeministri merr në telefon gjykatësit që të fusë njerëz në burg? I dini këto?

Nuk i di dhe asnjëherë nuk kanë qenë objekt diskutimi.

Ka pasur edhe një akuzë për përgjimin e prokurorëve dhe të gjykatësve.

Nëse kjo ka ndodhur është një faj penal. Dhe besoj se prokuroria i ka instrumentet e plota për ta vërtetuar këtë.

A keni ndonjë ide se kush janë këta ministrat që përmendi z. Manjani në deklaratën e tij që flinin tek Santa Quaranta?

As nuk kam dhe as nuk dua të merrem me këtë tip prononcimi në këtë nivel.

Z. Manjani e rëndoi akoma dhe më shumë akuzën kur tha që janë gjëra të regjistruara nga shërbimet partnere…

As personalisht, por as drejtuesit e LSI-së nuk kanë kontakt me shërbimet dhe aq më pak më interesojnë detaje të kësaj forme që për mua nuk janë politikë. Këto lloj historish nuk janë politikë.

Nuk u bëtë kuriozë ta pyesnit personalisht z. Manjani se kush ishin këto ministra?

Absolutisht që jo. Mund ta pyesni edhe vetë z. Manjani në e kam pyetur apo jo dhe është në standardin tim të komunikimit që as më interesojnë këto lloj historish, që sikurse e thashë, nuk janë politikë.

A mendoni që Kryeministri Rama ka gabuar në paragjykimin ndaj Donald Trump?

Kam qenë në ceremoninë e inaugurimit të z. Trump, dhe jam shumë i lumtur për këtë gjë, për një arsye shumë të thjeshtë. Unë personalisht kam pasur një bindjen time absolute në fitoren e filozofisë, mentalitetit dhe më në fund të njeriut Donald Trump. Dhe kjo më ka lumturuar shumë dhe fakti që fati e solli që pata mundësi të asistoj në inaugurimin e tij, sigurisht më bëri që të kem një kënaqësi unikale në jetën time. Unë nuk mund ta gjykoj Kryeministrin sepse unë kam qenë qartësisht i pozicionuar dhe shumë i motivuar duke ndjekur ecurinë e asaj gare.

Z. Vasili, si mundet një parti e majtë të jetë me Trump?

Donald Trump tha në ceremoninë e inaugurimit që të detyrojmë politikanët që jo vetëm të flasin por edhe të veprojnë sepse në Uashington hyri populli. Filozofia e presidentit Trump shkon drejt së mirës edhe për Amerikën, por edhe për të mirën e vendit tim.

A jeni dakord me vendimin e presidentit Trump që ndalon hyrjen në SHBA të njerëzve nga 7 vende të botës me shumicë myslimane?

Një vendim i ngjashëm dhe me të tilla kufizime, ka ndërmarrë edhe Barack Obama për Irakun për ngrirjen e vizave. Ky kufizim ishte bërë edhe për çështje të sigurisë.

A është aktiv George Soros në Shqipëri?

Ka qenë dhe është aktiv përderisa…

…Në çfarë roli është pozitivisht apo negativisht ?

Besoj në shumë role, por nuk e kam gjetur gjëkundi se ku ka qenë kaq i hapur pozitiviteti.

A është Edi Rama një produkt dhe investim personal i George Soros?

Nuk e di cilat kanë qenë marrëdhëniet e tyre. Por, i takon Edi Ramës ta shpjegojë gjerë e gjatë se cili ka qenë ky raport dhe e mira e këtij raporti që lidhet me Shqipërinë.

Nga gjenden paratë e mëdha prej miliona eurosh që investohen në fushatat elektorale?

Këto para vijnë nga kanale informale.

Edhe kriminale?

Kur janë informale mund të jenë gjithfarësh.

Si shpjegohet që politika pranon të marrë miliona euro nga burime ilegale, që mund të jenë edhe kriminale po ashtu? A është kjo një shkelje flagrante e rregullave të demokracisë?

Pa diskutim që është një shkelje. Kjo shkelje dhe ky konstatim është shqetësim madhor. Ka vetëm një mënyrë sesi mund të përballet, me veprime konkrete. Kemi qenë të parët dhe e para forcë politike që kemi vendosur në mënyrë të prerë dhe e zbatojmë prej pothuajse një viti transparencën absolute për çdo aktivitet tonin, duke detajuar në ueb-in tonë të gjitha elementët: shpenzimet, cili është burimi i shpenzimeve etj.

Duket sikur LSI-ja shpenzon më shumë para se partitë e mëdha, duke qenë më e vogël se ato skuq me flamujt e LSI-së në zgjedhje.

Nuk është e vërtetë. Është një spekulim komplet i sponsorizuar nga kundërshtarët politikë, apo të gjithë ata që janë në garë politike me ne. Shpenzimet e LSI-së kanë qenë tërësisht modeste dhe unë vetë kam drejtuar dhe udhëhequr listën në qarkun e dytë të Shqipërisë dhe sfidoj këdo, i cili të mund të më thotë që shpenzimet e LSI-së në qarkun e dytë elektoral më të rëndësishëm të Shqipërisë kanë qenë të ekzagjeruara, por mund t’ju them me bindje të plotë që kanë qenë shpenzimet më të varfra që ka bërë LSI duke pasur rezultat e dytë më të madh.

Z. Vasili a jeni i pasur ju?

Unë kam një banesë timen të viteve 60’ dhe kam legalizuar edhe një shtesë 20 metra katrorë dhomë të shtëpisë.

A keni frikë ju dhe politikanët e tjerë që reforma në drejtësi dhe futja në përdorim e SPAK-ut mund të çojë në dërgimin pas hekurave të burgut të shumë politikanëve?

Personalisht nuk kam frikë, të tjerët duhen pyetur.

Mendoni që ka frikë në politikë për reformën në drejtësi?

Ai që trembet, duhet të trembet. Secili ka një përgjegjësi individuale në raport me ligjin.

A mendoni që SPAK-u dhe strukturat e tjera që dalin pas reformës në drejtësi do të funksionojnë në këtë drejtim?

Mendoj që po, për dy arsye. Së pari, ligji është ndërtuar në mënyrë shumë të rreptë. Të jeni të bindur, më besoni, që duke qenë anëtar i Komisionit për Reformën në Drejtësi i njoh mirë ato dy ligje. Besoj janë ligjet ndofta më të rreptat që Evropa ka. Nuk besoj, edhe me ç’kemi parë nga një vështrim krahasues, në atë nivel rreptësie që janë ligjet tona. Së dyti, asistenca e vyer amerikane. Këtu kthehem në këtë çështje sepse ajo ka qenë mbështetëse e madhe, madje edhe kryerja e reformës në drejtësi me konsensus qe edhe ajo një kërkesë insistuese e Departamentit të Shtetit.

Ndihmës Sekretari i shtetit për krimin e organizuar, drejtësinë, programet në drejtësi dhe luftën kundër drogave, Ambasadori Brownfield ka qenë një ndër mbështetësit kryesorë dhe një nga njerëzit që ka inkurajuar së tepërmi Ilir Metën për të ecur fort në rrugën e konsensusit, e kjo ishte edhe një nga gjërat shumë interesante të takimit shumë të mirë, besoj të shkëlqyer, që Meta pati për këtë çështje dhe pjesë e këtij korpusi të madh reforme janë edhe SPAK-u dhe Byroja e Hetimit, të cilët janë instrumenti më pastrues që besoj ka pasur politika shqiptare ndonjëherë.

Z. Vasili, edhe një pyetje si politikan përpara se të kaloj në disa të tjera, duke i’u referuar burimeve të shtypit, Ambasada e Shteteve të Bashkuara të Amerikës u ka revokuar vizën amerikane atyre që e kanë pasur një numri prokurorësh dhe gjyqtarësh të niveleve të ndryshme. Numri është i paverifikueshëm, të paktën mendohet që është diku te 30-40, mund të jetë më i lartë, mund të jetë më i vogël, por në të përmendet emri i Kryeprokurorit, emrat e anëtarëve të Gjykatës Kushtetuese, emrat e anëtarëve të Gjykatës së Lartë, të gjykatave dhe prokurorëve të rretheve. Të gjithë këtyre u është revokuar viza, sipas deklaratës së Ambasadës Amerikane, mbi bazën e një perceptimi që kjo ambasadë ka në luftën kundër korrupsionit. Çfarë qëndrimi keni ju në lidhje me këtë çështje?

Së pari, informacioni në dispozicion është minimal.

Por ju e dini që kjo ka ndodhur, të paktën me Prokurorin e Përgjithshëm dhe me anëtar të Gjykatës së Lartë dhe të Gjykatës Kushtetuese…

Sot që ne bisedojmë bashkë, dua të jem korrekt, nuk ka asnjë konfirmim zyrtar nga Ambasada e SHBA dhe për sa kohë nuk ka listë emrash, unë nuk bëj komente për emra të veçantë.

Duke hyrë tek gjesti në parim..

Besoj që qëndrimi im individual për rastin individual është qëndrimi më i drejtë, qëndrimet kolektive, besojë se lënë vend për interpretim. Besoj që edhe ju jeni dakord që nuk mund të thuhet në tërësi, apo një kategori e caktuar, pasi përgjegjësia është individuale pasi aplikimi është individual dhe dosja e gjithsecilit është individual.

A keni frikë që kjo praktikë mund të shtrihet edhe tek politikanët?

Nuk dua të hamendësoj një gjë të tillë. Unë besoj që SHBA në mënyrë të veçantë koha shumë pozitive që dhe ritmi me të cilin është futur administrata e re amerikane, na bën të qetë që vendimet që do të merren do të jenë gjithmonë të drejta.

Keni më shumë besim tek administrata e Trump pasi dukej sikur Shqipëria kishte një lidhje më të mirë me administratën e Obamës?

Kam besim absolut!

I keni vendosur kontaktet si LSI?

Kontaktet janë të shumta. Ju patët mundësi që të përcillnit edhe Televizioni juaj edhe gjithë grupi mediatik i juaji pasqyroi me shumë korrektesë një vizitë të jashtëzakonshme që Ilir Meta pati. Pasi ju kujtoni jo vetëm takimet që pati jo vetëm në Departamentit të Shtetit, por me Presidentin e Senatit, Kryetarin e Komisionit të Ligjeve, Kryetari të Komisionit të Bujqësisë, dhe mjaft personalitete të tjera amerikane, Senatorë dhe Kongresmenë.

Përmend në mënyrë të veçantë këta njerëz që kanë edhe pozicione shumë të larta në të. Dhe ky komunikim intensiv në SHBA do të vazhdojë të jetë i tillë edhe në të ardhmen pasi ka një hapje shumë të mirë pozitive dhe kjo na bën shpresëdhënës dhe vëmendja e tyre shumë e madhe ndaj Shqipërisë na bën optimist.

Në zgjedhje do të dilni vetëm apo me LSI?

Me thënë të drejtën, kjo nuk është pyetje për ne sepse këto janë pyetje për ato forca politike që nuk kanë konkurruar vetëm. Ne kemi konkurruar vetëm. Në historinë tonë ne kemi marrë pjesë, gjithsej në 3 palë zgjedhje parlamentare, 2005, 2009, 2013 dhe kemi dalë vetëm një herë në koalicion në 2013. Pra pyetja a dilni vetëm e ka marrë përgjigjen.

Por në të dyja rastet keni pasur nga 4-5 deputet ndërsa sot keni rreth 20 deputet z. Vasili, që do të thotë që jeni fryrë me votat e PS?

Po ju shpjegoj, sepse unë u referohem shifrave. Këto komentet e përgjithshme i bëjnë ata që s’kanë durim. Në vitin 2005 kemi marrë 124 mijë vota dhe ju e dini shumë mirë që mandate të tëra të LSI u humbën për shkak të “Dushkut” të madh, që shkatërroi zgjedhjet dhe tashmë është bërë një fenomen politik. Në vitin 2009 ju e dini shumë mirë, ka qenë viti “i komplotit të madh” dhe LSI që në ditën e themelit dhe vazhdimisht, në përjashtim të vitit 2009, po t’i shikoni të gjitha rezultatet, të gjitha pa përjashtim kanë prodhuar jo më pak nga 11 apo 12 deputet.

Ndërkohë rritja ka qenë graduale, sepse LSI është një parti që ka shënuar gjithmonë rritje dhe është në filozofinë e vet. Dhe shifrat vetëm janë rikonfirmuar dorë pas dore. Ne konkurruam edhe në zgjedhjet e fundit të pushtetit lokal ku përsëri rritja qe në masën 40-50%, sigurisht konkurrimi ishte vetëm si forcë politike. Dhe çështja a konkurron apo nuk konkurron vetëm LSI e ka një përgjigje.

Ju çfarë do të preferonit personalit?

Unë për veten time nuk i dal përpara një vendimi i cili është një vendim kolektiv…

Më duket se shkarkimi i Manjanit dhe imponimit që ju bëri Rama është njëkohësisht një përgjigje për këtë pyetje?

Dua të them këtë gjë, që në fund të fundit është një vendim kolektiv politik, sepse përgjegjësia është kolektive, nuk është përgjegjësia e një individi. E kemi këtë risi që e marrim në këtë mënyrë vendimin. Do ta marrim sepse kemi disa gjëra përpara.

Së pari, nuk kemi përfunduar ende punë me Kodin Zgjedhor i cili është saktësuesi përfundimtar i rregullave dhe të mënyrës së konkurrimit dhe njëkohësisht janë dhe elementët të mëdha që janë futur të cilët kanë të bëjnë me programin e madh qeverisës të cilat janë edhe objekt të vlerësimit.

Pra, një vlerësim bazohet mbi disa çështje të mëdha që vihen në tavolinë për të marrë vendime logjike në radhë të parë, dhe e dyta më kryesorja, nuk do merret një vendim që është në favor apo jo të LSI. Këtu duhet sqaruar sepse është një vendim se si i shkon më mirë edhe ekuilibrave të vendit edhe stabilitetit politik.