Shanset e Anglisë për të qëndruar në Botëror ndodhen në duart e Italisë. Pas humbjes kundër Uruguajit, skuadra e Roy Hodgson pret një favor nga azurrët e Cesare Prandellit, të cilët duhet të fitojnë me Kosta Rikën për të mbajtur në lojë Tre Luanët.

Edhe barazimi në takimin e sotëm do të ishte tërësisht i padobishëm për anglezët, sepse eliminimi do të ishte një fakt i kryer pa pritur ndeshjen e fundit të grupit.

Në këtë situatë, Mario Balotelli shfaqet në skenë për të përfituar sadopak dhe nuk kërkon shumë, por thjesht një puthje në faqe.

Sulmuesi i italianëve ka shkruar në faqen e tij në Twitter, se nëse ai bëhet shpëtimtari i Anglisë, duke e ndëshkuar Kosta Rikën me gola, kërkon një puthje jo dosido, por një puthje mbretërore, dhe konkretisht nga mbretëresha Elizabet.

Një dëshirë dhe sfidë shumë e veçantë për Super Marion, por duket tepër e vështirë për t’u bërë realitet, duke njohur karakterin e ftohtë të monarkes së Britanisë.

Gjithsesi edhe nëse Italia arrin ta mposhtë Kosta Rikën, anglezët më pas duhet të fitojnë ndaj të njëjtit kundërshtar me diferencë të thellë golash.