Tiranë, 19 shtator 2012, NOA- Kanë nisur sot punimet për ndërtimin e rrugës “Ilia Dilo Sheperi” në njësinë bashkiake Nr. 5, rrugë e cila lidh dy zona të rëndësishme të kryeqytetit, zonën e Selitës me Unazën e Madhe.

I pranishëm në inaugurimin e rrugës ishte kryetari i bashkisë së kryeqytetit Lulzim Basha, i cili u shpreh se, nuk është kthyer në atë lagje për të bërë fushatë, ashtu siç kanë bërë kandidatë edhe kryetarë bashkie për 13 vite me radhë por për të mbajtur premtimin e dhënë.

Basha theksoi se një element tjetër i rëndësishëm është zëvendësimi i mureve që do të prishen, si rezultat i ndërtimit të rrugës me kangjella, si pjesë e angazhimit për t’u ofruar lagjeve ku ndërhyhet në infrastrukturë, një profil më qytetar dhe më europian.

Siç informon noa.al ky investim i Bashkisë së Tiranës, prej 40. 4 milionë lekësh parashikon edhe ndërtimin e kanalizimeve të ujërave të zeza dhe të bardha, ndriçim si dhe gjelbërim për të gjithë zonën. Punimet ne këtë segment rrugorë parashikohen të përfundojnë pas 10 muajsh.

Theksojmë se inaugurimi i fillimit të punimeve në rrugën “Ilia Dilo Sheperi” i paraprin fillimit të punimeve, në dy rrugë të tjera të Njësisë Bashkiake nr.5, të cilat do të sjellin një ndryshim në cilësinë e jetës së banorëve të kësaj lagjeje dhe një përmirësim të ndjeshëm në trafikun e rënduar të kësaj zone të mbipopulluar, ku janë bërë shumë ndërtime  objektesh por pak rrugë, në këto 15 vitet e fundit.

n.a/a.y/noa.al