Prishtinë, 16 shtator 2012, NOA- Ish-i dërguari i Sekretarit të Përgjithshëm të Kombeve të Bashkuara në negociatat për statusin Kosovës, Marti Ahtisari duke folur për dialogun Prishtinë-Beograd, ka thënë se në vend që të bisedohet, duhet të zbatohet ajo për të cilën është rënë dakord.

Përsa i përket Veriut të Kosovës, Ahtisari është shprehur se nuk mbështet nisjen e negociatave të reja, sepse kufijtë sipas tij janë ata që janë.

Ahtisari nënvizon se nuk ndjehet fajtor që Serbia e ka humbur të drejtën për të qeverisur me Kosovën.

“Nuk ndjej kurrfarë faji. Pse? Pyetja është e ngjashme me atë nëse Rusia duhet të ketë ndikim në Finlandë? Jo. Dy vendet janë të pavarura dhe ashtu duhet të sillen me njëra-tjetrën”, ka theksuar ai, për një të përditshme serbe.

Ahtisari gjithashtu është shprehur se me planin e tij çdo gjë është në rregull dhe se të gjithë e kanë ditur se çfarë do të ofrohej që në fillim të vitit 2006.

“Pas takimit në 31 janar të vitit 2006 në Londër, i kam lutur anëtarët e Grupit të Kontaktit që t’iu dërgojnë mesazhe private Beogradit, Prishtinës dhe serbëve të Kosovës. Pika e parë e atyre tetë mesazheve private ka qenë shumë e qartë: Në dritën e asaj që ka ndodhur në Kosovë, për shkak të aksioneve të Serbisë, kthimi i Kosovës në Serbi nuk është opsion i qëndrueshëm”, vijon ai.

Si i dërguar i OKB-së, Ahtisari ka hartuar Propozimin Gjithëpërfshirës, në bazë të të cilit është shpallur pavarësia e Kosovës më 17 shkurt të 2008-ës.