Tiranë, 15 gusht 2012, NOA- Kryetari i Partisë Socialiste Edi Rama, Partia Drejtësi Integrim dhe Unitet, Aleanca Kuq e Zi si dhe ish presidenti Bamir Topi shprehin ngushëllimet e tyre për ndarjen nga jeta të ish liderit të PDSH-së, në Maqedoni, Arbën Xhaferri.

“Arbën Xhaferri ishte një shqiptar jotipik që tha të vërteta të mëdha e hapi rrugë të pashkelura me trimëri të jashtëzakonshme intelektuale! Vdekja e tij një humbje e madhe për botën shqiptare në disa përmasa që veç Arbën Xhaferri i mishëronte në një njeri të vetëm. U prehtë në paqe”, thuhet në mesazhin ngushëllues të kreut të PS-së, Edi Rama.

PDIU: Moment zie në historinë moderne të kombit shqiptar

Edhe Partia Drejtësi, Integrim dhe Unitet shprehu ngushëllimet e sinqerta për humbjen e patriotit, politikanit e publicistit të madh Arbën Xhaferri.

“Humbja e njërit prej udhëheqësve më të palodhur të kombit shqiptar në tërësi e të shqiptarëve të Maqedonisë në veçanti përbën një moment zie në historinë moderne të kombit. Sot të gjithë zotohemi që të çojmë përpara idealet e Arbën Xhaferrit për bashkim kombëtar si mënyra më e mirë për të respektuar kujtimin e tij”, thekson PDIU në mesazhin ngushëllues.

AK: Amaneti për bashkimin kombëtar është gjallë

Pas ndarjes nga jeta të ish liderit të PDSH-së në Maqedoni, Arbën Xhaferri Aleanca Kuq e Zi i shpreh ngushëllimet e sinqerta dhe të ndjera familjes së tij.

“Aleanca Kuq e Zi shpreh keqardhjen për ndarjen nga jeta të mendjes më të kthjellët të politikës në trojet shqiptare. Fjalët janë të shumta për këtë njeri inovator dhe vizionar. Aleanca Kuq e Zi i uron prehje të qete e në paqe Arbën Xhaferrit duke i rikujtuar mbarë kombit shqiptar se amaneti për bashkimin kombëtar është gjallë”, përfundon mesazhi i AK.

Edhe ish presidenti Bamir Topi ka shprehur ngushëllimet e tij duke e cilëson humbjen e Arbën Xhaferrit, humbje kombëtare.

Arbën Xhaferri u nda nga jeta në moshën 64 vjeçare në një spital të Shkupit ku qëndronte shtruar prej disa ditësh pasi pësoi hemorragji cerebrale.

b.gj/noa.al