Bruksel, 6 gusht 2012, NOA- Bashkimi Europian i bën thirrje palëve për nisjen sa më shpejtë të dialogut mes Kosovës dhe Serbisë.

Zëdhënësja e përfaqësueses së lartë të BE, Catherine Ashton, Maja Kociançiç ka informuar për zhvillimin e konsultimeve të Brukselit për vazhdimin e bisedimeve ndërmjet Beogradit dhe Prishtinës.

“Po bëjmë çmos që dialogu sa më parë të nisë”, ka deklaruar Kociançiç.

Zëdhënësja e Catherine Ashton, përfaqësuesja e lartë e BE-së ditë më parë ka biseduar me kryeministrin serb Ivica Daçiç dhe me kryeministrin e Kosovës Hashim Thaçi, por ajo nuk ka saktësuar se kur do të caktohet raundi i ri i dialogut.

“Puna në raportin ka nisur, por meqenëse deri atëherë do të ketë kontakte, deri në momentin e fundit do të presim të shohim të gjitha informacionet për progresin në mënyrë që raporti të prezantojë realisht gjendjen e fundit”, ka thënë Kociançiç.

Gjithashtu ajo ka shtuar se Catherine Ashton ka theksuar se është me rëndësi që të dyja palët, edhe Beogradi edhe Prishtina, plotësisht të zbatojnë të gjitha marrëveshjet e arritura me dialog.

b.gj/noa.al