Tiranë, 31 korrik 2012, NOA – Një ngjarje e rëndë ka ndodhur mbrëmjen e sotme në kryeqytet. Një kambist është grabitur dhe plagosur me leva gjatë momenti që ka qenë duke shkuar në shtëpi. Ngjarja ka ndodhur zonën e ish-Bllokut te Libri Universitar në orën 23:10.

Viktime e sulmit fizik dhe grabitjes është Skënder Hasani, 53-vjeç, raporton noa.al. Hasani është sulmuar nga persona ende të paidentifikuar në momentin që ka hipur në ashensor për të shkuar në banesën e tij. Raportohet se grabitësit i kanë marrë atij 128 milionë lekë që ka pasur me vete. Fillimisht ai është qëlluar me leva dhe sende të forta. Më pas atij i është marrë dhe sasia e konsiderueshme e lekëve.

Sipas dëshmitarëve që kanë parë kambistin pas sulmit, ai ishte çarë në kokë dhe kishte marrë plagë të rënda.

Dyshohet se sulmi ndaj Hasani ka qenë i përgatitur. Ai kthehej në banesë pas punës dhe agresorët mund të kenë qenë në djeni të shumës së parave. 53-vjeçari është pronar i dy pikave të këmbimit valutor në Tiranë.

Hasani ka marrë plagë të rënda dhe është dërguar menjëherë në spital. Ndërkohë që policia është vënë në kërkim të autorëve të ngjarjes.

a.k/noa.al