Velipojë, 24 korrik 2012, NOA – Një fëmijë 9-vjeçar ka humbur jetën, si pasojë e goditjeve të rënda, që ka marrë nga çadra e plazhit.

Era e forta mesditën e së martës, ka bërë që çadra e plazhit të zhvendoset nga vendi dhe të godasë me forcë 9-vjeçarin, i cili ndodhej në plazhin e Velipojës së bashku me familjarët e tij për pushime.

I mituri, me inicialet R. Gjoni është goditur rëndë, ndërsa ishte duke pushuar në breg të detit, raporton agjencia e lajmeve noa.al.

Ndonëse pranë tij kanë shkuar menjëherë edhe pushuesit e tjerë të cilët janë përpjekur për të shpëtuar fëmijën, 9-vjeçari ka humbur jetën gjatë rrugës për në spitalin e Shkodrës,

Një ngjarje e njëjtë ka ndodhur edhe ditën e djeshme në plazhin e Durrësit, ku një 60-vjeçar është goditur rëndë në kokë po nga një çadër plazhi, e cila ishte zhvendosur nga era e fortë.

I plagosuri është dërguar menjëherë në gjendje të rëndë në Spitalin Ushtarak ku dhe po merr ndihmën mjekësore të duhur.

b.gj/noa.al