Plani rregullues i kryeqytetit duhet të rishikohet për t’u bërë më funksional. Kërkesa vjen nga Shoqata e Ndërtuesve të Shqipërisë, e cila synon zhbllokimin e tregut të ndërtimeve.

Sipas kreut të kësaj Shoqate, Maksim Muçi, ndërtuesit janë në pritje të konsultimeve pasi plani i ri rregullues i Tiranës, i miratuar në muajin Maj të këtij viti, duhet të krijojë hapësira të reja për ndërtimet dhe të ndikojë në uljen e çmimeve të apartamenteve.

Prej kohësh tregu i ndërtimeve në kryeqytet ka qëndruar në stanjacion, pasi lejet e fundit janë dhënë ne Prill të vitit 2009, dhe ka afro 3 vjet që ndërtimet e reja kanë qenë të pakta. Kjo ka bërë që të rriten çmimet e apartamenteve dhe ndërtimet e reja të përqendrohen në zonat periferike të Tiranës. Plani urbanistik parashikon ndarjen e kryeqytetit në 8 njësi vendore, ku parashikohen 3 parqe të reja, ai i Kasharit, Saukut dhe Dajtit, si dhe ndarja në 2000 blloqe në rang rajoni dhe 600 blloqe si qendër. Në plan janë parashikuar 7 qendra, të cilat do të kenë funksione administrative, argëtimi, pushimi biznese dhe akomodimi.