Lezhë, 14 korrik 2012, NOA Update – Mosmarrëveshjet me të motrën dhe familjen e saj për një apartament dhomë e kuzhinë të trashëguar nga prindërit janë arsyeja e krimit që tronditi Shëngjinin mëngjesin e sotëm, kur një efektiv i burgut të Shën Kollit vrau pas konfliktit të motrën, kunatin dhe plagosi nipin nëntëvjeçar, raporton agjencia e lajmeve NOA.al.

Efektivi i burgut të Shën Kollit Aleksandër Ndoj, 49 vjeç pas konfliktesh të shpeshta me të motrën 48 vjeçe Dana Ndoj, e qëlloi atë për vdekje dhe pas saj qëlloi edhe mbi bashkëshortin e të motrës apo kunatin 53-vjeçarin Luigi Benincassa dhe nipin 9-vjeçar, N. Benincassa, duke e plagosur rëndë.

Familjarët e viktimave bënë të ditur se motër e vëlla, Aleksandër e Dana Ndoj kanë patur prej kohësh konflikte mes tyre për një apartament dhomë e kuzhinë, i cili pretendohej nga të dy.

Por debati i sotëm pati një fund tragjik pasi Sandër Ndoj i drejtoi armën të motrës duke e lënë të vdekur në vend bashkë me të shoqin.

Pas krimit, efektivi i burgut të Shën Kollit në Lezhë është kthyer në banesën e tij të ndërtuar për pushuesit dhe duket se pasi ka bërë bilancin e krimit të kryer Sandër Ndoj ka qëlluar edhe mbi veten.

Policia e Lezhës bën me dije se nipi i tij nëntëvjeçar ka marrë dy plumba në gjoks dhe është transportuar për në Spitalin Ushtarak të Tiranës, ndërsa kunati gjeti vdekjen gjatë transportimit për në spitalin e Lezhës.

Uniformat blu të Lezhës kanë marrë në pyetje familjarët e tyre, të cilët dëshmuan se motër e vëlla nuk kishin gjetur mirëkuptim për shtëpinë që u kishin lënë prindërit.

Sipas tyre në kundërshtim me Dana Ndoj, bashkëshortja e të vëllait të saj nuk lëvizte nga shtëpia së bashku me dy fëmijët, vajzën 17 vjeç dhe djalin 9-vjeçar.

Viktimat jetonin në dy banesa pranë njëra tjetrës.

Sipas të dhënave prej 10 vitesh Luigi Benincasa, burri i motrës kishte marrë pasaportë shqiptare dhe punonte si përgjegjës në një stabiliment të përpunimit të peshkut.

mit/noa.al