Kryetari i Lëvizjes Socialiste për Integrim, z.Ilir Meta, rrëfehet në një varg pyetjesh të drejtpërdrejta, në emisionin “Fakt” të gazetarit Çim Peka në UTV

Z. Meta realisht ka një perceptim nga z. Nano dhe jo vetëm, që darka juaj me z. Rama te Gjiri Lalëzit e ka detyruar z. Berishën dhe është ndjerë i shantazhuar për të hequr dorë jo vetëm nga z. Nano por edhe nga Znj. Topalli?

Më vjen keq që të dëgjoj që darka e Gjirit të Lalëzit  paska ndikuar në çështjen e zgjedhjes së Presidentit, aq më tepër në dëm të z. Nano kur më parë se sa  të zgjidhej presidenti z. Nano e ka përshëndetur atë të ashtuquajturin takimi. Unë për çështjen e Presidentit kam pasur vetëm një takim me z. Nano, i cili është zhvilluar në hotel “Rogner” ku ka qenë i pranishëm dhe Sekretari i Përgjithshëm i LSI-së dhe njëkohësisht mik i z. Nano, z. Luan Rama. Ashtu sikur kam pasur një takim me z. Rama dhe z. Ruçi ku ka qenë dhe z. Vasili. 

Te darka e Gjirit të Lalëzit keni qenë vetëm ju dhe z. Rama?

Z. Peka unë darkat private nuk i komentoj, as drekat dhe as kafetë. Por duhet t’ju them juve dhe të gjithëve, se në të gjitha qëndrimet e mia për çështjen e presidentit, edhe me z. Nano që ka pasur dhe një interes të tijin, në kuptimin e një aspirate të shprehur publikisht, edhe me z. Rama që kishte interesat e tij si përfaqësues i Partisë Socialiste për të diktuar procesin sa më shumë të mundej, qëndrimi im ka qenë që unë jam interesuar si Kryetar i LSI-së për një proces sa më konsensual, sa më konstruktiv. Unë kam theksuar që nuk jam i interesuar që Presidenti i ri të jetë një eksponent i Partisë Demokratike, pa pasur paragjykim ndaj askujt por në vlerësimin tim zgjidhja më e mirë do të ishte një President sa më i pranueshëm nga të gjithë. Jo se nuk ka Partia Demokratike figura të pranueshme, apo Partia Socialiste, por për shkak të një politike konfliktuale e artificiale, e cila nuk ka baza reale, dhe për shkak të një egoizmi të lidershipeve të ndryshme për të paraqitur përpara si përkrahësve të tyre si mbrojtës të interesave të partisë, natyrisht që do të ishte më e mundshme dhe më e mirë për të arritur një zgjidhje që unë do ta konsideroja si të parametrave të rastit të z. Zaganjori. Por, unë ia kam bërë të qartë edhe z. Nano edhe cilit do tjetër që në do të mbështesim çdo zgjedhje konsensuale. Në rast se Partia Demokratike dhe Partia Socialiste do ishin në përkrahje të z. Nano , absolutisht që ne do ta përkrahim këtë, gjë që ishte një hap tepër pozitiv në raport me zotin Nano nga ana ime në krahasim me pesë vite më parë ku qëndrimi ynë dihet si ka qenë, pra kundërshtues. Pra, ky ka qenë qëndrimi ynë dhe si zotit Nano, si zotit Rama u kam bërë të qartë se për çështjen e presidentit unë kam një marrëveshje me Partinë Demokratike dhe me kryetarin e saj dhe përpara se të hedh hapat e mëtejshëm do të më duhet të konsultohem me të, gjë që ne nuk e kishim bërë deri kur kjo gjë ndodhi dy ditë apo një ditë përpara raundit të parë. 

Nano është shprehur se ai me zotin Berisha nuk ka pasur vetëm një komunikim zyrtar, ka pasur dhe komunikime të tjera me të dhe sipas zotit Nano, zoti Berisha kishte ndryshuar dhe ishte i detyruar të ndërronte radhët pas takimit Meta-Rama.

Unë nuk jam në dijeni të takimeve të tjera që kanë pasur aktorët e tjerë politikë. Unë jam në dijeni dhe plotësisht i ndërgjegjshëm për komunikimet me të gjithë aktorët. Absolutisht unë e theksoj se nuk ka asnjë justifikim, edhe Nano mund të ishte konsensual, por mundësitë tona këto ishin, po flas mundësitë tona si Lëvizje Socialiste për Integrim. Nuk mund të kushtëzonim këtë proces, as për zotin Nano, as për zotin Meta dhe për asnjë individ tjetër, sado vlera ai të kishte. Ne u vumë totalisht në funksion të procesit. 

A është e vërtetë që zoti Rama ju ka kërkuar 12 mandate të LSI në listën e sigurt të Partisë Socialiste?

Absolutisht nuk është bërë asnjë diskutim i tillë. 

A kemi marrëveshje të shkruar me shkrim dore midis jush dhe zotit Rama?

Koha kaloi, qeveria nuk ra, presidenti u zgjodh, koalicioni funksionon dhe unë kam vetëm një marrëveshje deri në fund të këtij mandati me zotin Berisha. 

Editoriali i zotit Rama për një mocion dhe lënia për të kuptuar nga ana e zotit Rama se ka një marrëveshje me Ilir Metën për të krijuar një shumicë të re presidenciale dhe një shumicë të re qeverisëse deri në 2013-ën.

Unë jam kundër shumicave që krijohen në bazë të projekteve afatshkurtra dhe jo transparente. Shumicat t'i kenë qytetarët. 

Zoti Rama në këtë studio u shpreh se zoti Meta është ish miku im, sërish nuk është miku im. Zoti Rama për ju është ish miku juaj apo miku juaj pas daljes?

Zoti Rama është kryetar i Partisë Socialiste dhe unë e respektoj për shkak se ai në fund të fundit përfaqëson Partinë Socialiste. 

A keni folur me zotin Rama pas zgjedhjes së presidentit?

Kemi pasur raste që dhe mund të kemi komunikuar. 

Pritshmëria e zotit Rama ndaj jush pas daljes ka qenë mjaft e madhe.

Nuk e di këtë gjë dhe unë nuk mund të flas në emër sa të tij dhe as të përfaqësuesve të tjerë të opozitës. Qëndrimi im ka qenë i përmbledhur në ato elemente që unë iu përmenda dhe juve. Pra, që Interesi im, i Lëvizjes Socialiste për Integrim ka qenë për një proces sa më konstruktiv, për një proces sa më konsensual dhe kemi bërë të gjitha përpjekjet në këto dy jave ku u hap procesi, i cili duhet të ishte hapur edhe më shpejt dhe po të kishte ardhur më shpejt unë kam qenë i bindur që do të kishte qenë plotësisht i suksesshëm sepse edhe zoti Berisha kur hyri në këtë proces hyri me përgjegjshmërinë për të gjetur një zgjidhje. Por nuk dua të paragjykoj që zoti Rama ishte i vendosur për të mos ofruar konsensusin. Ndoshta disa rrethana për mënyrën sesi u zhvilluan ngjarjet, pastaj vetë përcaktimi i afateve përcaktuese, solli këtë zgjidhje, e cila për mendimin tim përsëri është një zgjidhje shumë pozitive duke iu referuar edhe presidentit të ri të zgjedhur zotit Nishani. Nuk kam dëgjuar asnjë koment negativ, përkundrazi vlerësime shumë pozitive nga të gjithë dhe për më tepër mesazhet e tij kanë qenë mesazhe gjithëpërfshirëse, gjithëpërfaqësuese, gjë që tregon se ky proces pati vlera tepër pozitive, nuk ishte një proces perfekt dhe natyrisht që nuk mund të ishte i tillë për vetë faktin se nuk ishte një proces i parashikuar sesi duhet të ndodhte. Ishte shprehje e vullnetit të mirë dhe vetë termi ‘konsensus’ nuk ofron shumë konsensus në sensin e përcaktimit të tij apo të kuptimit të tij. Megjithatë mendoj se ishte një proces pozitiv që tregoi pjekuri, pati dialog, pati gjithëpërfshirje, pati shumë emra, pati shumë kandidatë, pati tërheqje, pati dhe votim ku Parlamenti pati sovranitetin e tij dhe mbi të gjitha besoj se presidenti i zgjedhur do të jetë prezent e do të punojë ngushtë me të dyja palët. 

Si u ra dakord mes jush dhe z. Berisha për emrin e z. Nishani, i cili është një emër tërësisht politik?

Emri i z. Nishani nuk mund të themi që ka qenë rastësisht për arsye se ka qenë një ndër katër emrat e përzgjedhur për natën e fundit që ofroheshin për konsensus. Emri i tij si një ministër tepër bashkëpunues me opozitën, dhe i vlerësuar prej saj. Së dyti emri i z. Imami si një ministër i mazhorancës aktuale por edhe si një ish ministër i qeverive socialiste. Pra si emra që ofronin një mirëkuptim apo kishin disa kualitete për të mos qenë të kontestueshëm nga ana e opozitës. Ndërkohë që vetëm 2 ditë më parë ishte tërhequr z. Zaganjori i cili në bindjen time ishte një kandidaturë tepër e gjetur dhe e goditur për konsensus nëse do t’i largoheshim figurave politike pasi në qoftë se çdo palë do ta kishte të vështirë që t’i argumentonte përkrahësve se përse e dha votën për një figurë të partisë kundërshtare. Ky ka qenë ngërçi kryesor për të arritur konsensusin pasi jam i sigurt se edhe vetë socialistët janë ndjerë shumë të qetë me zgjedhjen e z. Nishani dhe do të ndjehen shumë komodë gjatë presidencës së tij. 

A ju duket se humbët bastin tuaj politik në përpjekjet tuaja për të neutralizuar përpjekjen e z. Berisha për të zgjedhur një zyrtar të lartë të Partisë Demokratike?

Qëllimi im nuk ka qenë për të frenuar z. Berisha apo Partinë Demokratike për të pasur një president nga radhët e tyre. Qëllimi kryesor ishte arritja e konsensusit. Nëse emri për konsensus ishte i PD-së apo i PS-së apo i kujtdo apo edhe z. Nano nuk kishte asnjë lloj problemi, përkundrazi. A bëri z. Berisha përpjekje për këtë gjë? Absolutisht që po! Unë jam i bindur për këtë gjë pavarësisht nga teoritë konspirative që nuk mungojnë asnjë herë. Kjo është normale. Ne ishim të vendosur që jo vetëm të mbështesnim një kandidaturë si ajo e z. Zaganjori por edhe të mund të pranonim një kandidaturë që mund të vinte nga opozita pak e shumë me këto cilësi dhe kualitete. Ne u gjendëm të papërgatitur nga dorëheqja e z. Zaganjori dhe kishim një mungesë kohe. Megjithatë përsëri u bë një përpjekje e madhe për të ofruar një konsensus. Përsëri patëm një tërheqje tjetër dhe në këto kushte ose do jepnim një emër tjetër ose do shkonim në zgjedhje të parakohshme. Kështu që përpjekjet ishin maksimale. Mund të ishin edhe më shumë po të kishte filluar procesi më herët dhe po të kishim komunikuar më herët me z. Rama për emrin e z. Zaganjori mbase do të kishim evituar një ngërç që duket sikur u krijua në komunikim. 

Jeni i bindur z. Rama kërkonte realisht një president konsensual apo qëllimi final i tij ishin zgjedhjet e parakohshme?

Unë kam qenë i bindur dhe ka punuar deri në fund për të arritur konsensusin për emrin e z. Zaganjori sepse realisht nuk kishte asnjë argument për të kontestuar këtë figurë. Jo se në Shqipëri nuk ka persona të tjerë por shumë persona të tjerë nuk pranuan kandidaturën për këtë pozicion. Kjo sepse duke qenë të investuar në fushat e tyre dhe larg politikë e jetës politike por edhe duke pasur eksperincën se çfarë ka ndodhur në të kaluarën që figurat e mëparshme janë bërë edhe pjesë e shpifjeve apo denigrimeve me të cilat këta njerëz nuk janë mësuar. Pra ishte shumë e vështirë për të arritur në zgjidhje të tjera. Rasti i z. Zaganjori ishte rasti më i artë për të arritur këtë konsensus. Ky rast nuk arriti të finalizohej kështu që mëndoj se duke pasur parasysh afatet e Kushtetutës do të shkohej tek zgjidhja dhe në fund të fundit kjo zgjidhje është e pranueshme. 

Është e vërtetë që e keni propozuar ju emrin e z. Zaganjori dhe z. Berisha e ka mirëpritur?

E vërteta është që ëpr emrin e z. Zaganjori jam konsultuar disa ditë para se të diskutohej  me z. Berisha dhe me kolegët e tjerë e disa përfaqësues të shoqërisë civile dhe të medies dhe kam marrë nga këta disa vlerësime më të lartë për të. 

A ka qenë i informuar z. Rama për emrin e z. Zaganjori para se të bëhej publik nga mazhoranca?

Nuk mund ta them këtë por gjithçka është produkt i rrethanave dhe e presionit të kohës sepse në rastin kur u konkludua për këtë emër nga ana e mazhorancës ishte natë vonë dhe në mëngjes duhej të mblidhje komisioni parlamentar për procedurat. 

Keni tentuar t’i merrni një mendim paraprak z. Rama për emrin e z. Zaganjori përpara se ai të shpallej?

Jo sepse ne kemi diskutuar emra të ndryshëm dhe në fund kemi konkluduar që për efekt të kohës dhe për të bërë një zgjidhje të shpejtë dhe serioze të shkonim me një emër. Kështu që ka qenë e pamundur të bëheshin komunikime të tilla dhe menjëherë sapo ne kemi rënë dakord për këtë emër z. Patozi ka kërkuar një komunikim me z. Ruçi. 

Keni bërë ju një manovër për të dalë në fund fare me kandidaturën e znj. Topalli?

Absolutisht që jo! Mendoj se znj. Topalli është përmendur me pa të drejtë gjatë këtyre muajve. Unë kam pasur komunikime të vazhdueshme me të dhe nuk kam vënë re një ambicie të saj dhe gjatë gjithë këtij procesi ka qëndruar korrekte para gjithë këtyre paragjykimeve ballkanike. Tërheqja e z. Zaganjori tregoi se ai ishte vërtet një kandidat tepër i gjetur për të marrë edhe konsensusin e opozitës. 

Cilat janë raportet tuaja mes jush dhe znj Topalli?

Raportet e mia janë të shkëlqyera me zonjën Topalli. Edhe zonja Topalli mund të kishte qenë një presidente shumë e mirë. Përderisa është kryetare e parlamentit prej gati shtatë vitesh, nuk duhet të ketë asnjë diskutim se edhe këtë detyrë do ta bënte shumë mirë. Njëkohësisht duhet të kemi parasysh se është edhe detyra ajo që e orienton një politikan si ...bartës të funksionit në sjelljen e tij. Pra jam i siguritë që presidenca  si një institucion është një funksion që çdo personalitet e orienton për  të qenë i pranueshëm dhe më bashkues. 

Cilat janë raportet tuaja më zonjën Topalli pas incidentit të famshëm të parlamentit në momentin kur realisht anëtarja e KQZ-së që i takonte LSI-së i kaloi mazhorancës?

Marrëdhëniet e mia janë të shkëlqyera me zonjën Topalli. 

Keni komunikuar me të pas zgjedhjes së presidentit?

Në darkën që u organizuar për zgjedhjen e presidentit kemi qenë së bashku. 

Emri i zoti Hoxha nga kush është propozuar, nga ju apo nga zoti Berisha?

Emri i zotit Hoxha nuk është propozuar nga unë për hir të së vërtetës. Por, sapo unë e kam dëgjuar, e kam vlerësuar shumë për shkak se është një personalitet shumë i njohur dhe publik, me cilësi shumë të mira, dhe është drejtues i një instituti prej gati 15 vitesh, që ka pasur në fokus reformat e ndryshme, reforma të cilat janë të lidhura me proceset integruese  të Shqipërisë.  Vetë zoti Hoxha është një personalitet  që rrezaton aftësi, zotësi, dinjitet dhe përfaqësi. 

Ditën e largimit nga gara të zotit Hoxha jeni shprehur se ai ndihej i shantazhuar. Keni informacion për këtë zoti Meta?

Nuk dëshiroj të merrem me këtë çështje. Unë jam i bindur që kemi të bëjmë me shantazhe dhe me lojëra të cilat nuk kanë asnjë lidhje me personalitetin e tij. Më tej gjithçka ka qenë në funksion të ecurisë së procesit. 

A është e vërtetë që në një mbledhje kryesie jeni shprehur që nëse LSI do të propozonte një kandidaturë të vetën për president, do të ishte Artur Zheji?

Nuk dëshiroj që të nisim diskutimin për emra të caktuar. Asnjëherë nuk ka qenë qëllimi i LSI-së diskutimi për emra të caktuar. Qëllimi ka qenë ndërtimi i një procesi. Që nuk ka qenë diçka e lehtë dhe e thjeshtë sepse në fund të fundit ky proces konsesual u shkatërrua me ndryshimet kushtetuese, sepse sipas kushtetutës së mëparshme të pandryshuar, konsensusi ishte i imponuar, ishte i detyruar për shkak se në të pestë raundet duhej votuar me 84 vota. Pra ishte e vështirë të ndërtohej ky konsensus kur zgjidhja mund të bëhej dhe pa të. 

Z. Meta keni bërë ndryshime në qeveri në një kohë surprizë. A keni pasur probleme me kryesinë e LSI për këto ndryshime që këta emra t'i lini jashtë? Ku e merrni forcën për të bërë ndryshime kaq radikale brenda partisë?

Sepse unë besoj te ndryshimi, jo si qëllim në vetvete por si një mundësi për të filluar një hov të ri të punëve por dhe për të dhënë mundësi të reja bashkëpunëtorëve. Nuk mendoj se zgjedhja në qeveri është një privilegj, përkundrazi unë mendoj që është një përgjegjësi. Dhe nuk besoj se ikja nga qeveria është një ndëshkim përkundrazi është një mundësi për një reflektim por dhe për një angazhim më të spikatur politik apo partiak. Unë që jam këtu përballë jush kam qenë shumë herë dhe kam qenë shumë herë nga postet më të lartat. Dhe të gjithë ata që e shohin politikën në mënyrë afatgjatë, absolutisht që duhet të mësohen me ndryshimin e pozicionit të tyre. Ju përmendët një emër shumë të nderuar, sikurse është ai i Profesor  Edmond Panaritit. Dhe profesor Panariti është dhe profesor në fushën e toksikologjisë,  gjë që do të thotë se ka mundësi që me mirësinë dhe pozitivitetin e tij përveç vlerave të gjithanshme që ai ka jo vetëm për të ndihmuar në detoksikimin e politikës këtu por dhe  për të kontribuar për eliminimin e toksinave që ende ekzistojnë në politikën rajonale. Dhe unë jam i bindur që ai ka dhe eksperiencën politike për të qenë një përfaqësues shumë i denjë dhe për të kontribuar dhe në proceset integruese sikurse ka kontribuar në mënyrë konkrete në të gjitha fushat, por ka kontribute të spikatura shkencore dhe akademike. Është një profil i ri i Ministrit të Jashtëm dhe sigurisht do të jetë profil i suksesshëm, dhe këto nuk janë thjesht mendimet e mia apo bindja ime, por të jeni të sigurt që kjo është bindja e të gjithë atyre që e njohin nga afër dhe e partnerëve Ndërkombëtarë. 

Megjithatë Panariti nuk ka eksperiencën e duhur si Haxhinasto apo jo?

Haxhinasto është me një eksperiencë shumë të gjerë në marrëdhëniet ndërkombëtare, në organizatat ndërkombëtare dhe të jeni të sigurt që do të realizojë një përfaqësim shumë dinjitoz. 

Çfarë e lidh zotin Haxhinasto me ekonominë?

Haxhinasto ka një profil shumë më të gjerë sesa diplomacia dhe njëkohësisht është me një formim shumë të vlerësuar dhe në fushat e administrimit, të menaxhimit. Këto i ka siguruar që nga Universiteti ‘Brigston’ në Shtetet e Bashkuara dhe në shumë universitete evropiane dhe duke qenë edhe një figurë e Lëvizjes Socialiste për Integrim, duke qenë edhe një nga hartuesit e programit të kësaj lëvizjeje mendoj që në këtë ditë të fundit të qëndrimit të tij brenda vendit si figurë tashmë kryesore e LSI në qeverisje, do të jetë shumë pozitiv për LSI, por edhe për qeverinë. 

Çfarë duhet të bëjë Luan Rama për t’u bërë ministër?

Luan Rama ka një detyrë shumë të rëndësishme si sekretar i përgjithshëm i Lëvizjes Socialiste për Integrim dhe ka shumë mundësi të kontribuojë në këtë detyrë shumë më tepër sesa mund të kontribuojë një ministër. 

Do të ketë sërish ministra të tjerë të LSI-së pa mbaruar ky mandat, a do të kemi sërish ndërrim?

Kjo nuk është një përgjegjësi e imja për të folur sot për këtë çështje absolutisht kur bëhen ndryshime apo kur bëhen lëvizje, kur nuk bëhen me paragjykimin se pas këtyre do të vijë një lëvizje tjetër, aq më tepër që nuk ka as kohë. Unë besoj se këto janë ndryshime mjaft pozitive  sepse duhen parë në kompleks. Zoti Vasili do të ketë një rol shumë më të madhe e shumë aktiv në LSI. Zoti Naço si nënkryetari i Kuvendit. Pra, në cilësinë e vet, këto lëvizje do të sjellin një performancë shumë aktive të LSI në të gjitha frontet. 

Ka një kontestim të fortë të zotit Nano të mënyrës sesi ju dhe zoti Berisha qeverisni.

Unë kam dëgjuar vlerësime të tjera prej tij. 

Këto vlerësime i keni dëgjuar kur zoti Nano shpresonte se mund ta propozonit për president.

Kjo nuk ka asnjë rëndësi. Në rast se këto janë mendimet e tij, kjo është e drejta e tij dhe ne respektojnë të drejtën e çdo qytetari në këtë vend dhe pse jo të zotit Nano. 

Zoti Ngjela ka bërë një analizë mbi mënyrën tuaj të qeverisjes së përbashkët me zotin Berisha. Në gjykimin tuaj kjo analizë është në vazhdimësinë e joshjes që PS dhe opozita mund t’i bëjë LSI mbi një mocion mosbesimi mbi qeverinë ‘Berisha’ apo realisht pas kthimit nga Uashingtoni ju konsideroheni si partneri më i besueshëm i atyre për të ndryshuar kursin e kësaj qeverisjeje?

Së pari, avokati ka qenë, është dhe do të mbetet gjithmonë indipendent, kështu që nuk duhet ta paragjykojmë. Ai ka shprehur dhe shpreh mendimet e tij dhe këto lëvizje janë si rezultat i një reflektimi por dhe përgatitje të LSI për vitin 2013 dhe një rikompozim forcash, energjish në të tria drejtimet në qeveri, në Parlament edhe në parti. Të treja komplementohen me njëra-tjetrën në funksion të një qëllim të përbashkët. 

Zoti Arvizu ka deklaruar pak më parë se politikanët ndihen të lodhur. Menjëherë më pas ju u shprehët se qeveria ka nevojë për një ritëm të ri. Ju ndryshohet ministrat tuaj. A prisnit një rifreskim total të qeverisjes edhe nga Partia Demokratike?

Një ritëm i ri nuk do të thotë domosdoshmërish ndryshime individësh dhe unë nuk dëshiroj të komentoj qëndrimet që merr në këtë drejtim zoti Berisha si kryeministër dhe si kryetari i Partisë Demokratike, është e drejtë e tyre. Por absolutisht që është ndier përpara, ndihet edhe sot, do ndihet dhe nesër nevoja për të ecur më shpejt dhe kjo domosdoshmërish nuk do të thotë thjesht ndryshime individësh, do të thotë një axhendë më e pacaktuar, më llogarikërkuese e llogaridhënëse, objektiva që ndiqen cdo ditë me ritëm dhe përgjegjësi që dalin çdo ditë. 

Së shpejti keni konventën. Statusi juaj nuk lejon kandidimin e kryetare më shumë se dy herë. Do të garoni sërish për kryetar të LSI-së?

Nuk i shmangesha kësaj përgjegjësie. Pavarësisht shqetësimit tuaj për statusi i cili nuk shkelet sepse unë jam zgjedhur vetëm vetëm një herë. Kështu që do të garoj dhe një herë. 

Do të garoni vetëm apo do të keni përballë një kandidaturë alternativë?

Nuk i vendos unë këto. Secili duhet të marrë vetë përgjegjësinë. Nuk mund të vendoset dikush me pahir thjesht për të qenë në garë. 

A mund të flasim për një vazhdimësi të këtij koalicioni edhe pas vitit 2013?

Ne vazhdojmë të funskionojmë në mënyrë tepër konstruktive dhe do t’i qëndrojmë siç i kemi qëndruar marrëveshjes sonë me Partinë Demokratike në mënyrën më korrekte të mundshme. Çështja e koalicionit pas viti 2013 është një çështje për të cilën do të vendoset në prill apo në maj të vitit të ardhshëm. 

E përjashtoni mundësinë e koalicionit parazgjedhor me Partinë Socialiste?

Kjo është një temë që nuk më tërheq aspak as mua dhe as LSI-në përpara se të vijë momenti për arsye se ka ende shumë kohë që të duhet për të vazhduar qeverisjen dhe për të përmirësuar atë. 

A është një tabu që ju të jeni ministër e z. Rama Kryeministër?

E gjithë koha deri tani ka treguar se nuk mund të ndërtohet asgjë pozitive mbi paragjykime të cilat i takojnë së kaluarës. Absolutisht që gjithçka ka qenë dhe do të jetë rrjedhojë e vullnetit të qytetarëve shqiptarë. Aftësia e LSI-së ka qenë, është dhe do të jetë të realizojë sa më mirë vullnetin e tyre. Vendimi që do të marrë LSI-ja i cili do të merret në kohën e duhur do të ketë si referencë kryesore pikërisht atë se cili bashkëpunim do të ishte më i dobishëm për të ardhmen, për integrimin evropian të vendit. Megjithatë ka mjaft kohë. 

A ndjeheni i rrezikuar nga z. Nano dhe lëvizja e tij?

Unë nuk i kërcënuar kur Nano ka qenë Kryeministër dhe aq më tepër nuk kam arsye që të ndjehem tani kur dhe ai ka vendosur si qëllim kryesor t’i shërbejë integrimit evropian të vendit. 

Mendoni se e majta vjen në pushtet pa LSI-në?

Në asnjëherë nuk i kemi penguar PS-në dhe z. Rama të fitojnë pa LSI-në. 

Mendoni se ky koalicion qeverisës mund t’i fitojë zgjedhjet e vitit 2013?

Ky koalicion kaloi një provë para një viti dhe konfirmoi një shumicë bindëse. 

Do të jeni ju sërish ministër apo pretendimet tuaja janë shumë më lart se kaq?

Nuk është çështje pretendimesh. Kur ramë dakord me z. Berisha që të krijonim këtë qeveri unë nuk doja të isha pjesë e saj për shumë arsye por arsyeja kryesore ishte angazhimi më i madh me LSI-në dhe jo thjesht me funksione të caktuara që kërkojnë edhe e tyre fizike. Por edhe për të bërë të qartë që ne nuk po bënim një lojë por po hynim në qeveri për të kontribuar për stabilitetin dhe integrimin e vendit e pranova atë pozicion. Unë mendoj se në këtë pozicion që jam e ndihmoj edhe qeverisjen më mirë sepse kur nuk je pjesë e drejtpërdrejtë e saj i shikon të gjitha zhvillimet me një sy tjetër. 

A keni një sondazh se ky ndodhet LSI sot dhe a keni një parashikim se me çfarë numrash do të jeni në vitin 2013?

Ne jemi të sigurt se është rritur bindja dhe mendimi që një LSI më e fuqishme do të thotë më shumë stabilitet, do të thotë më shumë normalitet, do të thotë më shumë arsye në tryezat vendimmarrëse dhe njëkohësisht do të thotë më shumë shpresë që politika t’i përgjigjet asaj tolerancë që ekziton sot ndërmjet qytetarëve shqiptarë me çfarëdolloj përkatësie politike.