Tiranë, 15 qershor 2012, NOA- Në përfundim të seancës së sotme gjyqësore me fëmijët e Kryeministrit Sali Berisha, Argita dhe Shkëlzen Berisha, deputeti socialist Saimir Tahiri i kërkoi gjykatës riçeljen e procesit të hetimit gjyqësor me arsyen se disponon prova të reja.

Një tjetër arsye ishte për shkak se një seancë gjyqësore është zhvilluar pa praninë e tij dhe pse deputeti Tahiri më herët kishte kërkuar shtyrjen e saj pasi ishte seanca parlamentare kur do të votohej për Presidentin e ri të Republikës, raporton noa.al.

Tahiri tha se kjo seancë ishte zhvilluar në kundërshtim me ligjin sepse avokati i deputetit socialist nuk kishte të drejtën e përfaqësimit gjyqësor të tij kur ai vetë nuk ishte i pranishëm në seancë.

Por gjykata e ka rrëzuar këtë kërkesë të deputetit Tahiri ndërsa më pas Tahiri kërkoi përjashtimin e gjyqtarit të çështjet me argumentin se ai ka faktuar qëndrimin e tij të njëanshëm më shumë se njëherë me vendimet e ndërmjetme që ka dhënë gjatë këtij procesi gjyqësor.

Edhe sot nuk u dha vendimi pasi u kërkuar nga deputeti Saimir Tahiri kohë për të hartuar konkluzionet përfundimtare.

a.y/noa.al