Elvana Gjata u shpall mbrëmjen e së enjtes si fituesja e edicionit të trete të spektaklit Dancing With The Stars Albania. Kështu Elvana ka fituar çmimin e madh, një apartament luksoz, që e merr si një dhuratë fantastike përveç trofeut të “Dancing 3”, raporton noa.al.

Elvana garoi bashkë me pesë konkurrentë të tjerë deri në finale pas eliminimit më herët të bukurosheve Afërdita Dreshaj dhe Adelina Tahiri. Dy mikeshat ishin të larguarat e mbrëmjes gjysmëfinale te spektaklit të “Tring Dixhital” e “Vizion Plus”. Afërdita dhe Adelina dolën më pak të votuarat mes kombinimit te pikëve te jurisë dhe publikut, pa u përballur kështu ne sfidën “Dance Off”.

Në finale Elvana u përball me këngëtarin tjetër Vedat Ademi dhe fitorja në fakt ishte e vështirë pasi pikët e të dyve ishin shumë afër njëri-tjetrit.

Pas marrjes së çmimit, këngëtarja shprehu falënderime për ata që e mbështetën. “Jam jashtëzakonisht shumë e emocionuar. Ndjej që kam fituar me të vërtetë shumë. Kjo ishte një eksperiencë e jashtëzakonshme që unë e prisja, sepse që e vogël kam dashur të merrem me balet. Dhe tani kam fituar një eksperiencë të jashtëzakonshme që do të vlejë në karrierën time ndaj i faleminderit publikut që më bëri të fitoja këtë garë sot”, - u shpreh plot emocione Elvana.

Fitues i çmimit të dytë, Vedat Ademi po ashtu ishte i kënaqur: “Ka qenë vërtetë eksperiencë e paharrueshme për mua. Dua të falënderoj familjen time në radhë të parë, dy prindërit e mi, dy vëllezërit e mi dhe motrën time. Sigurisht që të gjithë produksionin, përfshirë të gjithë stafin. Pa diskutim përshëndes jurinë që na ka mbështetur. Sigurisht falënderoj Enadën dhe Gertin”, – tha Ademi.