Kryeministri i vendit Sali Berisha u largua për në shtëpi pas një vizite mjekësore që kreu në ambientet e Sanatoriumit për t’u kontrolluar lidhur me një virozë që po kalon.

Burime zyrtare nga Sanatoriumi thanë për agjencinë e lajmeve noa.al, se pas konsultës së zhvilluar me mjekët e këtij spitali lidhur me shqetësimet e tij shëndetësore, z.Berisha është rikthyer në shtëpi.

Prej dy ditësh, kreu i Qeverisë ka qenë në gjendje jo të mirë shëndetësore për shkak të një viroze gripale të stinës. Për këtë shkak mendohet të jetë shtyrë edhe mbledhja e Qeverisë e parashikuar për t’u mbajtur ditën e djeshme si dhe aktivitetet e dy ditëve të fundit. a.y/noa.al