Tiranë, 14 qershor 2012, NOA- Nëpërmjet një deklarate për mediat Bashkia e Tiranës shprehet se kryebashkiaku Lulzim Basha i qëndron plotësisht dhe i vendosur projekteve të shpallura prej tij për një Tiranë të gjelbër.

Vetë Plani Urbanistik i hartuar dhe miratuar nga grupi strategjik, pjesë e të cilit janë edhe ata që sot folën për shkatërrimin e hapësirave të gjelbra parashikon parqe të reja, rikuperimin e atyre ekzistuese dhe shtimin e hapësirave të gjelbra nëpër blloqet e banimit anembanë Tiranës.

“Sa i përket deklaratave të bëra sot nga disa ambientalistë, bëjmë me dije se, Drejtoria e Përgjithshme e Rrugëve ka nisur punën për zgjerimin e “Rrugës së Elbasanit”, një arterie e rëndësishme kombëtare. Kjo rrugë, nga Fakulteti Ekonomik deri tek rrethrrotullimi i Saukut, me gjatësi 1.7km, do të jetë me 6 korsi 2x8m me trafikndarëse prej 1.5m ku është parashikuar dhe gjelbërim si dhe me tortuarë në të dy anët e rrugës. Zgjerimi i kësaj rruge do të lehtësojë ndjeshëm trafikun, do të ulë koston e lëvizshmërisë, do të ndikojë në reduktimin e ndotjes dhe do të përmirësojë cilësinë e jetës banorëve të Tiranës. Zgjerimi i rrugës diktoi nevojën e ndërhyrjes në këtë pjesë të parkut. Specialistë të Bashkisë dhe Drejtorisë së Përgjithshme të Rrugëve kanë shfrytëzuar të gjitha mundësitë që ndërhyrja në park të jetë sa më e vogël”, thuhet në reagimin e Bashkisë Tiranë, raporton noa.al.

Në vijim shtohet se çdo i interesuar, qoftë qytetar, ambientalist apo arkitekt, i ka dyert e hapura në Bashkinë e Tiranës për të marrë informacion për këtë çështje por dhe për çdo projekt që realizohet apo do të realizohet në Bashkinë e Tiranës.

Theksohet se përtej aludimin dhe lojës politike me këtë fakt,  Bashkia e Tiranës garanton çdo qytetar se numri i pemëve të prera për t’i hapur rrugë realizimit të këtij projekti të rëndësishëm dhe me impakt në cilësinë e jetës së qytetarëve të Tiranës do të dhjetëfishohet brenda këtij viti në ambiente të tjera të këtij parku.

a.y/noa.al