Budapest, 13 qershor 2012, NOA - Kryeministri i Kosovës, Hashim Thaçi dhe homologu i tij hungarez Viktor Orban rikonfirmuan nivelin e shkëlqyer të marrëdhënieve mes Kosovës dhe Hungarisë, raporton agjencia e lajmeve NOA.al.

Gjatë vizitës në Hungari, kryeministri i Kosovës falenderoi kryeministrin hungarez për ndihmën e Hungarisë në njohjen e shtetit të pavarur dhe demokratik të Kosovës dhe mbështetjen e saj për perspektivën euro-atlantike të Kosovës.

Thaçi gjatë takimit i ftoi investitorët e Hungarisë të investojnë në Kosovë, dhe mori premtimin e kryeministrit Orban për inkurajimin e biznesit hungarez për të investuar në Kosovë.

Gjatë takimit dy kryeministrat ndanë mendimin se dy vendet dhe popujt duhet të vazhdojnë të intensifikojnë bashkëpunimin dhe këmbimin e përvojave më të mira.

Gjatë vizitës në Hungari, kryeministri i Kosovës, Hashim Thaçi mori pjesë në Forumin Ekonomik në Budapest/Hungari.

Gjatë fjalimit të tij Thaçi prezantoi arritjet e Qeverisë së Republikës së Kosovës në funksion të fuqizimit të sektorit privat.

“Ekonomia e Republikës së Kosovës ka qëndruar shumë e fortë gjatë kësaj periudhe krize të ekonomisë ndërkombëtare. Në tri vitet e kaluara, zhvillimi makroekonomik ka qenë stabil, me një rritje ekonomike rreth 5 %. Kjo falë politikave të matura makroekonomike dhe makrofiskale të Qeverisë së Republikës së Kosovës. Bizneset që operojnë në Republikën e Kosovës përfitojnë nga vendosja e marrëdhënieve bilaterale me disa shtete për evitimin e tatimeve të dyfishta. Qeveria e Republikës së Kosovës ka realizuar me sukses aktivitete tjera që kanë ndikuar në përmirësimin e klimës investive. Që nga viti 2009, Qeveria e Republikës së Kosovës ka ndryshuar politikën tatimore në favor të komunitetit të biznesit, duke përgjysmuar normën e tatimit në fitim. Kemi përmirësuar efikasitetin e shërbimeve të Administratës Tatimore, duke digjitalizuar shumicën e shërbimeve për komunitetin e biznesit. Jemi në përfundim të realizimit dhe së shpejti do të fillojmë me projekte të rejat kapitale me qëllim të përmirësimit të infrastrukturës rrugore”, theksoi Thaçi.

Kryeministri i Kosovës ftoi investitorët hungarezë të investojnë në Kosovë duke dhënë më tej tetë nga arsyet:

-          Fuqia punëtore e re, entuziaste dhe e gatshme për të përvetësuar njohuri dhe shkathtësi të reja; kjo dëshmohet sidomos me rritjen e numrit të atyre që vazhdojnë me arsim të lartë brenda dhe jashtë vendit;
-          Politika e favorshme fiskale;
-          Masat Preferenciale me BE dhe me SHBA
-          Marrëveshjet për Tregti të Lirë, siç është CEFTA
-          Resurset natyrore, sidomos ato në fushën e energjetikës dhe të minierave;
-          Procesi i privatizimit të ndërmarrjeve publike e së shpejti edhe i disa pjesëve të ndërmarrjeve  shoqërore;
-          Kërkesa e lartë e tregut për produkte dhe tregu në rritje;
-          Qasja e shpejtë në tregjet rajonale dhe evropiane e mundësuar nga pozita gjeografike e Republikës së Kosovës.

Shefi i Qeverisë së Kosovës nënvizoi se Republika e Kosovës ka nevojë për investime, andaj për këtë qëllim ai i ftoi investitorët hungarezë ta vizitojnë Kosovën për të zbuluar nga afër mundësitë për zhvillimin e bizneseve të tyre.

mit/noa.al