Tiranë, 1 qershor 2012, NOA - Ministria e Punëve të Jashtme të Shqipërisë (MPJ) ka reaguar sot për situatën në veri të Kosovës. Me anë të një deklarate Ministria e Jashtme dënon ashpër dhunën e përsëritur të strukturave paralele dhe bandave kriminale serbe kundër trupave paqeruajtës të KFOR-it në fshatin Rudarë.

“MPJ mbështet vendosmërinë e Qeverisë së Republikës së Kosovës për ushtrimin e sovranitetit të saj, vendosjen e rendit e ligjit për të siguruar lirinë e lëvizjes në të gjithë territorin, në bashkëpunim të ngushtë me KFOR-in dhe EULEX-in”, thuhet në reagimin e Ministrisë së Jashtme.

Nga ana tjetër, MPJ kërkon dënimin e autorëve që plagosën paqeruajtësit në këtë zonë të Kosovës. “Duke i uruar shërim të shpejtë paqeruajtësve të plagosur në aksionin për të siguruar lirinë e lëvizjes në veri të Kosovës, theksojmë se nxjerrja para drejtësisë e autorëve të dhunës, si dhe çmontimi i strukturave paralele e kriminale serbe të sigurisë janë imperative për të vendosur rendin dhe ligjin edhe në këtë pjesë të vendit”, thuhet në reagimin e MPJ-së.

Më herët edhe Bashkimi Europian shprehu shqetësimin për situatën në veri. Zëdhënësja e baroneshës Katherine Ashton, Maja Koçijançiç ka kërkuar ruajtjen e qetësisë dhe shmangien e tensioneve.

“Është një operacion i KFOR-it për të hequr barrikadat. Atje kanë nisur akte dhune. Për ne, parimi i lirisë së lëvizjes është një nga parimet kryesore. Kjo çështje është adresuar edhe në dialogun Kosovë-Serbi. Ne jemi në kontakt me partnerët e NATO-s. Në raste të tilla nxisim të gjithë të tregojnë përmbajtje nga aktet e dhunës dhe bashkëpunim me institucionet ndërkombëtare që veprojnë në Kosovë”, u shpreh Koçijançiç, raporton noa.al.

a.k/noa.al