Tiranë, 31 maj 2012, NOA – “Vendimi i Bashkimit Evropian për dorëzimin e udhërrëfyesit për liberalizimin e vizave me Kosovën më 14 qershor përbën një hap të rëndësishëm për heqjen e vizave edhe me Kosovën”.

Kështu shprehet Partia Drejtësi, Integrim dhe Unitet (PDIU), e cila vlerëson se ky vendim është tejet i vonuar, pasi sipas saj, të gjitha procedurat për liberalizimin e vizave me Kosovën duhet të kishin përfunduar, në mënyrë që të mos ekzistojë asnjë “vrimë e zezë” në Ballkan, nga ana e Bashkimit Evropian.

PDIU përshëndet këtë vendim, i cili është në shërbim të bashkëkombësve në Kosovë, duke inkurajuar se duhet ecur me hapa më të shpejta.

Në këtë drejtim, PDIU i bën thirrje shtetit shqiptar që t’i ofrojë Kosovës të gjithë asistencën dhe përvojën e vet në lidhje me detyrimet për liberalizimin e vizave, procedurë që Shqipëria e ka tejkaluar vetëm tre vite më parë.

mit/noa.al